Noticias

A party informática XGN R Encounter arranca con cerca dun millar de inscritos e o dobre de velocidade de conexión

A party tamén volverá contar coa ‘Extranet’, unha zona cun completo programa ao que poderán acceder gratuitamente os rexistrados e tamén os visitantes que se acheguen ao recinto de Silleda. Un espazo que conta cada vez con máis asistentes que queren experimentar, divertirse e escoitar a expertos do sector.

A XGN R Encounter segue así avanzando para converterse na segunda lanparty máis importante do Estado. Un obxectivo no que ten gran peso a súa vinculación coa rede de ' Encounters' da Fundación Euskaltel, que vén desenvolvéndose desde hai máis de 25 anos, e da que forman parte a Euskal Encounter, a Gipuzkoa Encounter, a Araba Encounter e a Technium R Encounter de Ourense.

Máis actividades

Este evento conta con numerosas actividades dirixidas exclusivamente aos rexistrados, como concursos de arte dixital nas súas tres vertentes, creación de imaxes dixitais, música dixital e programación. Ademais, o ‘hardware’ contará con numerosas actividades, entre elas modificación e personalización de equipos, ‘granxas’ de impresoras 3D e zonas de realidade virtual orientadas unicamente a estes participantes. Sumaranse os torneos de videoxogos, que nesta ocasión aumentan un 25% os seus títulos e inclúen estilos para todos os gustos. Ademais, haberá outras actividades tan divertidas como o “3 en pong”, a “ teletenda”, o “ trabaparty”, o “salto, salto…pedra, papel, tesoira” ou o “ cutreatro”

Por outra banda, tanto para os inscritos como para os visitantes á Extranet haberá moitas outras actividades. Destacará a proposta de realidade mixta, que combina a realidade virtual cun escenario con partes reais, o cal supón unha inmersión total. Nesta edición aumentáronse espazo e salas, e nelas poderán vivirse experiencias como camiñar por encima de edificios nunha gran cidade, mergullarse baixo o mar ou voar sobre un dragón.

Sumaranse a elas distintas conferencias con títulos tan atractivos como “Claves para que o teu negocio triunfe na internet”, “Seguridade e privacidade na rede”, “Mamá, mamá, quero ser hacker”, “Desenvolvemento de software no século XXI: converte a túa paixón na túa profesión”, “Introdución ao hacking de videoxogos” e “ Ivao, presente e futuro”.

Tamén haberá talleres, como “crea R” de robótica, onde os nenos poderán iniciarse na montaxe destes enxeños electrónicos nunha iniciativa enmarcada no programa Digitalent da AMTEGA, e os de chovafoam, material para o vestiario de cosplay (actividade consistente en usar disfraces e accesorios para representar unha personaxe de videoxogo, cinema, manga ou cómic). R tamén pon en marcha este ano unha xornada dedicada ás empresas, na que un experto en redes sociais ofrecerá pautas e consellos ás pemes para comunicar ben na internet e un emprendedor socio tecnolóxico de R expoñerá como sacou adiante a súa aventura empresarial.

As propostas continuarán con xogos de mesa, xadrez, billar, pistas deportivas, zona de consolas, campionato de karting, partidos de fútbol burbulla, un rocódromo, unha exposición de figuras de ciencia ficción, un concurso de cosplay ou zonas de rol, nerf e wargame.

En total serán máis de 70 as actividades dun programa que medra respecto á pasada edición co obxectivo de que a XGN R Encounter siga gañando en atractivo tanto para os rexistrados como para os visitantes.