domingo, 8 de noviembre de 2026
Consellería de Cultura e Turismo renova o seu apoio económico á Asociación Culturgal para a organización da 12ª edición da feira homónima, que terá lugar do 29 de novembro ao 1 de decembro no Pazo da Cultura de Pontevedra. As novidades que ofrecerá este ano o evento foron detalladas hoxe no transcurso dun acto no que tamén se anunciou a apertura das convocatorias para a reserva de expositores e para a proposta de actividades cara ao deseño da programación artística e profesional.
O director da Axencia Galega das Industrias Culturais (Agadic), Jacobo Sutil, participou nesta presentación xunto Víctor López, presidente da Asociación Culturgal, Xosé Aldea, director do evento, e os representantes das institucións implicadas.
Unha achega de 65.000 euros
Alí explicou que a Xunta achega 65.000 euros a esta nova entrega do evento, do que vén sendo a principal entidade patrocinadora nos últimos anos, ademais de facer fincapé no acaído do lema deste ano, Dálle unha volta á Feira, co que a organización reflicte o seu empeño en se renovar e en mirar sempre cara adiante para que Culturgal continúe sorprendendo o público e, sobre todo, resultándolle útil ao sector.
Para o responsable da Agadic, esta feira exemplifica a efectividade das sinerxías de colaboración entre as administracións públicas e o sector privado. Ao tempo, subliñou que, ademais do apoio económico, o Goberno galego tamén participa en Culturgal en calidade de promotor cultural: A Consellería conta sempre cun espazo propio no recinto do Pazo da Cultura, desde o que difunde numerosas iniciativas xestionadas polos seus diferentes departamentos, ademais de promover directamente na última edición unha vintena de actividades lúdicas, formativas, profesionais e de difusión, sinalou.
Entre as novidades de Culturgal 2019 destaca a redistribución espacial do recinto feiral e unha mellor adecuación dos escenarios aos contidos da Feira baixo os nomes Familiar (cos eixos Falar, Moverse e Descubrir), Foro e Carpa, ademais do espazo dedicado á Arte Contemporánea e a incorporación dun específico para a cultura interactiva (videoxogos, apps, etc.)
A feira está promovida pola Asociación Culturgal, que engloba á súa vez as asociacións profesionais máis representativas do sector: Asociación Galega de Editores (AGE), Asociación Galega de Empresas de Artes Escénicas (Escena Galega), Asociación Galega de Empresas Musicais (AGEM), Empresas Galegas Dedicadas a Internet e ás Novas Tecnoloxías (Eganet) e Asociación Galega de Produtoras Independentes (Agapi).
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
