domingo, 6 de julio de 2025
A Comunidade galega iniciou o verán afianzando o seu crecemento turístico despois de cinco anos de comportamento positivo e acadando, no mes de xuño, preto de 460.000 viaxeiros. Así se desprende dos datos feitos públicos hoxe polo Instituto Nacional de Estatística (INE) nos que, ademais, se reflicte que Galicia pechou o mes de xuño cun incremento do 8% no número de turistas.
A Enquisa de Ocupación Hoteleira revela que os datos positivos veñen dados, en boa medida, pola chegada de viaxeiros internacionais, que lideran o crecemento. Tanto é así que a Comunidade galega acadou os mellores datos de turistas estranxeiros da súa historia para este período, experimentando un incremento do 19%. Esta cifra tradúcese en que ao longo do mes de xuño os turistas de fóra de España pasaron en Galicia máis de 280.000 noites.
Estas boas cifras permiten reforzar os crecementos consecutivos que Galicia viña rexistrando desde que comezou o ano. Trátase de seis meses de incremento que permiten constatar o traballo de desestacionalización impulsado entre a Xunta de Galicia e os profesionais do sector, que está a permitir que os datos de turismo medren tamén en temporada media e baixa.
Mellora da ocupación
O incremento no número de turistas ten como consecuencia unha mellora dos niveis de ocupación nos hoteis galegos. Segundo os datos do INE, no mes de xuño este crecemento foi de case dous puntos porcentuais. A cifra elévase aínda máis se falamos das fins de semana.
Ao longo do mes de xuño contabilizáronse nos hoteis galegos preto de 870.000 pernoitas, o que supón un crecemento do 6,6% en relación ao mesmo mes do ano 2018. Este incremento posibilita que a situación de Galicia mellorara con respecto ao contexto estatal, xa que supera en catro puntos a subida rexistrada a nivel nacional.
Competitividade do sector
Tamén o sector viu mellorados os seus resultados desde o punto de vista económico. Segundo as estatísticas do INE, as tarifas hoteleiras medraron preto dun 4% e a rendibilidade aumentou case un 10% en maio. Así, cos datos coñecidos hoxe, o turismo galego continúa avanzando na boa dirección grazas ao esforzo colectivo do sector e ao compromiso da Xunta de Galicia por traballar nun destino competitivo e desestacionalizado.
EuroPCom, a Conferencia Europea de Comunicación Pública, é a maior reunión anual de expertos en comunicación pública de Europa organizada polo Comité Europeo das Rexións en colaboración coa Comisión Europea, o Parlamento Europeo, o Consello, o Banco Europeo de Investimentos, o Comité Económico e Social Europeo e a Organización para a Cooperación e o Desenvolvemento Económicos. O evento ofrece unha plataforma para explorar as últimas tendencias, iniciativas e ideas no ámbito da comunicación pública. O director xeral de Relacións Exteriores e coa Unión Europea, Jesús Gamallo, participou nesta Conferencia organizada polo Comité Europeo das Rexións, e celebrada baixo o lema 'Máis alá das palabras. Unha historia de confianza'.
O Diario Oficial de Galicia publica hoxe a declaración de Ben de Interese Cultural da Rapa das Bestas de Sabucedo por considerar acreditado o seu valor sobranceiro como patrimonio inmaterial do pobo galego, ao tratarse dunha das festas máis antigas de Galicia que conta, como mínimo, con tres séculos de historia. Este recoñecemento supón a aplicación de inmediato do réxime de tutela da Lei de Patrimonio Cultural e, polo tanto, o maior nivel de protección. Esta distinción, que se suma á de Festa de Interese Turístico Internacional acadada en 2007, chega tras o visto e prace a este decreto por parte do Consello da Xunta este pasado luns, 30 de xullo, e logo de completarse o expediente administrativo, no que constan os dous informes preceptivos dos órganos consultivos favorables.
