domingo, 8 de noviembre de 2026
A actividade de mañá dará comezo coa primeira destas estreas: o espectáculo Circopeta, que Odaiko representará por vez primeira ás 11,00 h. na Fundación SGAE. Juan Collazo dirixe esta creación colectiva, pensada para o público infantil e familiar, na que Ruliño o entrañable personaxe da obra O cabaliño de buxo, de Neira Vilas amosará o mundo do circo rural coa axuda duns intrépidos percusionistas.
O circo é tamén parte fundamental de Evolution, a segunda das estreas de Galicia Escena PRO, a cargo de Alfredo Muíño e a súa Compañía N+1. O Auditorio Abanca acollerá ás 17,30 h. esta peza, que tamén bota man do teatro e da danza para plasmar a historia da humanidade en tres actos: unha infancia violenta, unha madurez viva e relativamente equilibrada e un porvir incerto.
Intercambio con MADferia
Ademais, esta terceira xornada de Galicia Escena PRO ofrécelle ao público unha proposta chegada desde Madrid, grazas ao intercambio que se establece con MADferia por segundo ano consecutivo. Desta volta, trátase do espectáculo Réquiem, de Rotura Producciones, que poderá verse na Fundación SGAE ás 12,30 h. A actriz Esther Bellver é a alma mater desta compañía, así como a directora e intérprete da montaxe coa que lle rende unha sentida homenaxe ao seu pai, recentemente falecido.
Pola súa banda, o Teatro Principal será o escenario de Pink Unicorns, que La Macana representará ás 19,30 h. Coproducida co Centro Coreográfico Galego, entre outras entidades, esta proposta enfronta o desafío de poñer en escena un pai co seu fillo adolescente e abordar así as coincidencias e rivalidades nas relacións paterno-filiais.
A carteleira de mañá rematará con O empapelado amarelo, o espectáculo de debut de A Quinta do Cuadrante, a nova compañía de Melania Cruz e Tito Asorey. Baseado no relato autobiográfico de Charlotte Perkins Gilman, referente feminista da literatura universal, ofrece unha reflexión sobre a necesidade de continuar loitando pola liberdade da muller e pola defensa da creatividade e da imaxinación para a construción dunha personalidade completa. Melania Cruz é a intérprete desta produción, que representará ás 22,30 h. no Salón Teatro.
O público xeral pode asistir aos 20 espectáculos programados nesta sétima edición de Galicia Escena PRO segundo as localidades dispoñibles unha vez completado o acceso dos profesionais con acreditación. A entrada é gratuíta, previa retirada no despacho de billetes correspondente desde unha hora antes do comezo das funcións.
Café e debate
En canto á programación reservada aos máis de 150 axentes culturais inscritos, mañá desenvolverase o segundo dos Cafescena no Hotel Costa Vella, baixo o título Programación e circulación escénicas. Distintas perspectivas e distintas realidades, para o que se contará coas achegas de Olga Mojón, directora do Teatro Principal de Ourense; Enrique Camacho, xefe de proxectos do Instituto de Artes Escénicas de Tenerife; Sergi Calleja, director de distribución do Grupo FOCUS, e Juan Vicente Martínez, director do festival Sagunt a Escena. O debate, que dará comezo ás 16,00 h., estará moderado por Belén Pichel, presidenta de Escena Galega.
A xornada rematará na sala Riquela Club coa terceira e última Noitescena PRO, que ofrece un programa musical sorpresa do que poderán gozar todos os acreditados.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
