viernes, 26 de abril de 2024
O conselleiro de Cultura e Turismo, Román Rodríguez, avanzou este mediodía as principais novidades da sétima edición do mercado Galicia Escena PRO, que terá lugar desde o vindeiro luns 10 ao xoves 13 en diferentes espazos de Santiago de Compostela. Máis de 150 axentes culturais chegados desde diferentes puntos de Galicia e do resto de España daranse cita neste evento, que por vez primeira se leva a cabo baixo a organización compartida entre a Axencia Galega das Industrias Culturais (Agadic) e a asociación empresarial Escena Galega.
Román Rodríguez destacou a aposta da Xunta de Galicia por este evento que supón unha gran plataforma de apoio á distribución das artes escénicas galegas e grazas ao cal Santiago será durante tres días a capital e o epicentro dos principais axentes do sector de toda a Península.
O programa deste ano articúlase arredor da exhibición dos 20 espectáculos en cartel, entre os que se atopan dúas estreas absolutas e outras dúas montaxes de teatro de rúa, e unha programación exclusivamente profesional que inclúe unha sesión de pitching de proxectos e varios momentos pensados especificamente para favorecer o networking, como os novos Cafescena e Noitescena PRO.
Favorecer a interrelación
Así o explicou Román Rodríguez na presentación desta sétima entrega do mercado galego de artes escénicas, que tivo lugar no Centro Obra Social Abanca e na que estivo acompañado por Jacobo Sutil, director da Agadic, e Juan Rodríguez, representante de Escena Galega. Este espazo de Abanca é precisamente unha das novas localizacións de Galicia Escena PRO, onde se establecerá desde o luns a oficina e a recepción dos profesionais acreditados, ademais da coordinación das súas axendas de reunións a través do chamado facilitador, papel que será exercido polo propio Juan Rodríguez. Coa incorporación desta figura, xa existente noutras feiras sectoriais, búscase dinamizar a interrelación entre os programadores de teatros, auditorios e festivais convidados e os representantes de compañías e empresas distribuidoras.
Deste xeito, incídese no obxectivo prioritario deste encontro que, como lembrou o conselleiro, está deseñado para dinamizar o noso sector escénico e servir de escaparate cara á compra-venda de producións galegas de teatro e danza. Con este mesmo fin, aos xa habituais aperitivos na Fundación SGAE, súmanse este ano novas accións destinadas a propiciar as conversas e o intercambio profesional. É o caso dos Cafescena que se servirán de martes a xoves, ás 16,00 h. no Hotel Costa Vella, e durante os que se abordarán cuestións que lle afectan directamente ao sector, como os protocolos na exhibición teatral para a infancia e a xuventude, distintas experiencias na programación e circulación escénica e a implicación das asociacións na xestión de feiras e festivais. Outros dos puntos de encontro serán a Biblioteca Anxel Casal, onde o xoves pola mañá terá lugar a mesa de traballo Cara a unha escena plural, e a Sala Riquela coas Noitescena PRO, como peche das tres primeiras xornadas do mercado.
Os devanditos espazos súmanse aos catro que este ano repiten como escenarios da programación de espectáculos: Auditorio Abanca, Fundación SGAE, Salón Teatro e Teatro Principal. Neles representaranse as 20 montaxes en cartel, das que 17 son galegas e foron seleccionadas por unha comisión artística nomeada por Escena Galega. As tres restantes chegan desde Madrid, Cantabria e País Vasco dentro das vías de intercambio abertas con MADferia e co proxecto Camiño Escena Norte.
Teatro nas prazas
Como en anos anteriores, o público terá a oportunidade de gozar destas propostas de xeito gratuíto, en función das butacas dispoñibles en cada caso e previo paso polo correspondente despacho de billetes. Ademais, este ano Galicia Escena PRO farase sentir nas rúas de Compostela coa representación de OhLimpiadas!, da compañía galega Sincronacidas, na praza de Cervantes, e de Femmes, da vasca Hortzmuga Teatroa, na Quintana.
Destacan tamén na carteleira desta sétima edición dúas estreas absolutas: Circopeta, espectáculo de teatro musical para público infantil de Odaiko, e Evolution, proposta de Alfredo Muíño e a súa Compañía N+1, na que se mestura circo, teatro e danza. Ademais, este programa reflicte claramente as pautas de selección marcadas polo comité de Escena Galega no sentido de procurar un equilibrio de linguaxes, poéticas e formatos, ademais dunha participación compensada entre compañías de longa traxectoria e de recente creación, abríndolle ás portas a formacións non programadas en anteriores edicións do mercado. Sobresae igualmente a presenza de mulleres en diferentes responsabilidades artísticas e a profesionalidade na xeración dos proxectos e nos procesos de produción das compañías seleccionadas.
A partir deste luns poderán verse en Santiago nove títulos para público adulto (Liberto de Marelas Producións, Despois das ondas de ButacaZero, Dúas donas que bailan de Teatro do Atlántico, O empapelado amarelo de A Quinta do Cuadrante, Idiota de Redrum Teatro, Bernarda de Malasombra Producións e A compañeira de piso de Contraproducións, xunto coa devandita estrea de Compañía N+1 e o espectáculo Réquiem, da madrileña Rotura Producciones), cinco para público infantil e familiar (Mai Mai de Baobab Teatro, Ummm!!! Unha comedia musical para chupar os dedos! de Avento Producións Teatrais, A toupiña que quería saber quen lle fixera iso na cabeza de A Xanela do Maxín, a estrea de Circopeta e El inolvidable viaje de Nana, da compañía cántabra Café de las Artes Teatro), catro de novas linguaxes (A Gala de Licenciada Sotelo, Deixa de tocala, Sam de AveLina Pérez & Velpister, As vacacións máis longas de Diego M. Buceta e Pink Unicorns de La Macana) e as dúas montaxes de rúa de Sincronacidas e Hortzmuga Teatroa.
Os espectáculos galegos programados foron elixidos entre 59 propostas recibidas, mentres que na sesión de presentacións en formato pitching que terá lugar o xoves exporanse 10 dos 29 proxectos presentados: Cest pas Possible! de Sempre Arriba, Carabela de Galeatro, Clausura do amor de Cámara Negra Teatro, Dreaming Juliet de Elefante Elegante, Illas desertas de ArtesaCía, Lixo de O Baúl da Tía Tola, Nun cuarto da rotonda de Acusmaser Opus, O mel non caduca de Ibuprofeno Teatro, Os nenos da varíola de Pérez&Fernández e Todas as marabillas do mundo de Producións Dispersas e Voa, voa! de Talía Teatro. Neste caso, os programadores acreditados terán a oportunidade de coñecer de primeira man un adianto do que están a preparar as compañías galegas cara á vindeira temporada escénica.
A Cidade da Cultura reunirá estes días as persoas representantes dunha vintena de linguas minoritarias de Europa. Será durante a asemblea xeral e a conferencia anual da Network to Promote Linguistic Diversity (NPLD), unha organización de ámbito europeo cuxa finalidade é promover a diversidade lingüística na UE. Entre os seus membros figura, desde a súa creación, a Xunta de Galicia, que, a través da Consellería de Cultura actúa como anfitrioa nos eventos de 2024. Na xornada trataranse os asuntos que atinxen á administración da organización e presentaranse varios informes.
A Xunta vai solicitar de xeito inmediato ao Goberno central o traspaso dos medios materiais e persoais para xestionar a súa costa trala sentenza do Tribunal Constitucional que avala a Lei de ordenación e xestión integrada do litoral de Galicia. A conselleira de Medio Ambiente e Cambio Climático, Ángeles Vázquez, respondeu unha pregunta no pleno do Parlamento sobre esta materia na que salientou que o Alto Tribunal certifica que a norma galega é plenamente constitucional. Ademais, subliñou, confirma o que sempre defendeu a comunidade, que non é necesario reformar o Estatuto de Autonomía para que Galicia poida exercer plenamente as súas lexítimas competencias sobre o litoral.
