Galiciantunes On Tour presenta os directos de Davide Salvado e Fernando Barroso no evento profesional de música SOL Madrid
Os galegos Davide Salvado e Fernando Barroso actúan este sábado 8 no encontro SoL Madrid, evento profesional arredor do negocio da música que arranca hoxe na capital de España. Ambos ofrecerán cadanseu showcase no Impact Hub Piamonte, onde se presentarán baixo a marca GalicianTunes On Tour diante dun exclusivo grupo de programadores de festivais, axencias de contratación e medios de comunicación de 11 países: Arxentina, Chile, Colombia, Corea, Emiratos Árabes, EE.UU., Holanda, México, Noruega, Reino Unido e Suíza. Definido pola organización como evento boutique, SoL Madrid inaugúrase esta noite no Costello Club e a súa actividade continuará ata o sábado en diferentes espazos da cidade.
A súa participación nesta cita insírese na serie de accións que a Consellería de Cultura e Turismo está a desenvolver baixo o distintivo GalicianTunes On Tour co obxectivo de reforzar a proxección exterior da música de Galicia. Entre elas, a súa presenza en SOL Madrid mediante un acordo asinado entre a organización e a Axencia Galega das Industrias Culturais (Agadic) para garantir a inclusión de bandas ou artistas de Galicia no apartado de showcases.
Selección de 20 artistas
Definido pola organización como evento boutique, SoL Madrid inaugúrase esta noite no Costello Club e a súa actividade continuará ata o sábado en diferentes espazos da cidade. O seu programa articúlase arredor de tres eixos: reunións de negocios personalizadas entre unha quincena de convidados internacionais e un grupo de empresas de representación e contratación, selos discográficos e servizos para a industria musical; sesións de networking e os concertos promocionais dos 20 artistas e grupos seleccionados tras unha convocatoria para a que se recibiron máis de 400 propostas.
Davide Salvado e Fernando Barroso, que actuarán o sábado a partir das 17,00 h., forman parte desta carteleira xunto a outros 14 intérpretes e bandas do resto de España e seis de Arxentina, Corea, Italia, Portugal e Uruguai.
No caso de Davide Salvado, os convidados aos showcases terán a oportunidade de se achegar con el á expresión máis pura e carismática da música tradicional galega, froito do seu amplo traballo de investigación recollendo cantares en aldeas e vilas dentro e fóra de Galicia, así como da súa longa traxectoria sobre os escenarios tanto en solitario como xunto a outros coñecidos músicos galegos. En 2019, Salvado está a presentar Amarelo, un novo espectáculo no que reinterpreta cancións tradicionais galegas e doutras partes do mundo, acompañadas dos textos do escritor, guionista e actor Manolo Cortés. Nesta xira, acompáñano en escena Pedro Pascual e Pablo Dalama.
Pola súa banda, o multiinstrumentista Fernando Barroso forma parte de diferentes proxectos musicais, mentres continúa presentando en directo os temas do seu segundo traballo discográfico, Silence Lovers Club, xunto a Margarida Mariño ao violoncello. Neste disco, o swing e o jazz mestúranse con aires persas e coa tradición galega, sempre coa mandolina como fío condutor.
R., 2019-06-06
Actualidad
O equipo, eminentemente galego e cunha moi alta porcentaxe feminina, está a filmar en distintas localizacións das provincias da Coruña e Lugo, a través das que se reconstrúe o nacemento e a evolución da mítica fábrica de cerámica, que se deu en chamar a Bauhaus galega polas cores, formas e deseños vangardistas das súas creacións. Ao tempo, contarase tamén a historia de Galicia a través do seu deseño, cos seus elementos diferenciais e de calidade no centro do discurso. Outros dos escenarios polos que discorrerá Hoxe e o resto do mundo son Cervo (Lugo), onde comeza esta historia a primeiros do século XIX, Sada (A Coruña) e Santiago de Compostela, ademais doutros espazos da cidade herculina.
O CDG celebra os 40 anos da súa fundación desenvolvendo unha intensa programación que estende a súa actividade á produción e participación en 15 espectáculos e proxectos escénicos, a máis de 100 concellos de toda a Comunidade e á colaboración con entidades dunha decena de países en Europa e América. En palabras de Román Rodríguez, conselleiro de Cultura, a unidade teatral continuará avanzando nunhas liñas mestras que, desde o respecto ao pasado, poñen o foco en novas vías de encontro coa cidadanía, na accesibilidade, na proxección exterior ou na creación galega.
Notas
A Facultade de Química será entre os días 3 e 6 de setembro a sede do XI Congreso Internacional de Nanociencia e Nanotecnoloxía Analítica (XI NyNA 2024). O encontro está organizado polo grupo de investigación de Elementos Traza, Espectroscopía e Especiación (GETEE) e o Instituto de Materiais (iMATUS) da USC coa colaboración do Grupo Especializado en Ciencia e Tecnoloxías (Bio) Analíticas da Real Sociedade Española de Química (RSEQ).
Os vindeiros 9, 10 e 11 de abril celébrase na Universidade da Coruña o primeiro congreso IA & Hospitality, un espazo onde se analizará a relación presente e futura entre a Intelixencia Artificial e o turismo, un dos principais motores económicos do noso país. O programa do congreso, que terá lugar no Paraninfo da UDC, inclúe oito mesas de debate nas que se tratará dende a experiencia do cliente ata a ciberseguridade e os destinos e a IA.