lunes, 21 de septiembre de 2026
O vicepresidente da Xunta, Alfonso Rueda e a presidenta do Colexio Oficial de Traballo Social de Galicia, Míriam Rodríguez asinaron hoxe o convenio que pon en marcha a quenda de garda social, especializada e permanente, para atender a mulleres vítimas de violencia de xénero e aos seus fillos e fillas menores. O acordo está dotado cun investimento de algo máis de 253.000 euros.
Segundo indicou o vicepresidente da Xunta, esta quenda de garda social permitirá ás vítimas ter acceso a unha atención personalizada e profesional desde o momento da presentación da denuncia, cando poderán dispoñer dun profesional de apoio que lles prestará información sobre axudas e recursos e un apoio integral.
O servizo de garda poderá ser activado polas forzas e corpos de seguridade de Galicia, ou ben polos xulgados con competencias en materia de violencia de xénero. O procedemento comezará cunha chamada ao Teléfono de Información ás Mulleres (900400273), que se porá en contacto co profesional de garda para garantir a súa presenza inmediata.
A efectos de secuenciar as intervencións e facelo de forma coordinada, a intervención do traballador pu traballadora social terá lugar unha vez iniciada ou finalizada a actuación do psicólogo ou psicóloga pertencente á quenda de garda psicolóxica. Ademais, o persoal que forme parte desta garda recibirán formación especializada na materia para prestar a mellor atención posible ás vítimas.
Este servizo súmase así á quenda de garda psicolóxica especializada e permanente, que se puxo en marcha por vez primeira a finais de 2018 a través dun convenio co Colexio Oficial de Psicoloxía de Galicia, a través da que se garante a presenza dun profesional desde o primeiro momento para atender as necesidades psicolóxicas das mulleres e previr a posible vitimización secundaria, entre outros obxectivos.
Medio milleiro de investigadoras e investigadores e máis de 150 actividades científicas nas sete cidades galegas: Vigo, Ourense, Pontevedra, Santiago, A Coruña, Ferrol e Lugo. Así se celebrará en Galicia a sexta edición da Noite Galega das Persoas Investigadoras, G-Night 2026, unha actividade na que a comunidade científica galega une talento e esforzos co obxectivo de achegar a ciencia á cidadanía e espertar vocacións científicas, ao tempo que se ofrecen propostas de lecer científico, cultural e educativo para toda a familia.
A Xunta de Galicia reclama ao Goberno central medidas estruturais de apoio ao sector agrogandeiro. Do mesmo xeito, esíxese que se teña en conta a realidade de cada territorio á hora de levar a cabo estas actuacións, que deben executarse de xeito urxente. Así o trasladou a conselleira do Medio Rural, María José Gómez, na Conferencia Sectorial celebrada en Madrid, na que se dirixiu ao ministro de Agricultura, Pesca e Alimentación, Luis Planas, para facer estas reclamacións. Alí, reafirmou tamén o compromiso do Executivo galego con este sector.
