domingo, 8 de noviembre de 2026
O Festival Interceltique de Lorient anunciou esta tarde en París o programa da súa 49ª edición, na que este histórico encontro da cultura celta celebra o Année de la Galice (ano de Galicia). O acto, para o que se contou coa colaboración da Embaixada de España, tivo lugar na sala Pan Piper da capital francesa e incluíu un concerto de Mercedes Peón co seu proxecto Déixaas.
Deuse así conta do especial protagonismo que a música galega terá do 1 ao 11 de agosto en Lorient, ata onde viaxarán máis de 20 artistas e grupos galegos como parte da programación elaborada polo festival co apoio da Consellería de Cultura e Turismo. Así o explicou nesta presentación Lisardo Lombardía, director xeral do Intercéltico, quen estivo acompañado por Roberto Varela, conselleiro de Asuntos Culturais da Embaixada de España en París.
Ademais de Mercedes Peón, na súa 49ª edición Lorient contará tamén con algúns dos nomes máis internacionais da música galega, como Carlos Núñez ou Milladoiro, xunto con novos artistas que están a renovar a nosa tradición musical, como Davide Salvado, Aliboria ou Tiruleque, e agrupacións que, como Xacarandaina, traballan día a día na súa recuperación, mantemento e difusión.
Carpa Galician Tunes
Galicia contará, ademais, cunha carpa propia baixo a marca Galician Tunes, a través da que a Xunta apoia a proxección exterior da nosa música. Este espazo acollerá 55 concertos nos que participarán 15 intérpretes e agrupacións con máis de 300 músicos. O obxectivo é amosarlle ao público un amplo abano de formatos, estilos e tendencias que, a partir da música tradicional, percorren sonoridades diversas, ademais de ofrecer tamén unha serie de actividades complementarias como obradoiros sobre instrumentos, cantos de taberna e charangas.
Na mesma carpa, pero en horario de tarde, celebraranse tanto os concertos como os seráns, que lle ofrecerán ao público a parte máis lúdica da nosa tradición, así como as foliadas xa chegada á noite.
Como complemento á actividade musical, Galicia fará gala en Lorient de todo o seu potencial como destino cultural e gastronómico a través dunha exposición, dunha programación audiovisual e doutras accións complementarias que reforzarán a presenza protagonista dos nosos grupos nesta 49ª edición do festival.
O Intercéltico de Lorient reúne en cada edición máis de 4.500 artistas de Bretaña, Escocia, Gales, Cornualles, Illa de Man e Irlanda, así como de Galicia e Asturias, ademais duns 120.000 espectadores con entrada e 750.000 visitantes na localidade.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
