Noticias

Galicia defende a alianza con Francia para reformar o futuro Fondo Europeo Marítimo e de Pesca e mellorar a súa eficacia

Celebrouse hoxe o Consello Consultivo de Pesca para Asuntos Comunitarios, no que se expuxeron as reivindicacións de Galicia de cara ao futuro Fondo Europeo Marítimo e de Pesca (FEMP), que rexerá entre os anos 2021 e 2027. Presentouse tamén no encontro o acordo acadado con Francia polo que os dous países reclamarán unha maior simplificación do fondo e que se aclaren cuestións que no pasado provocaron retrasos na execución dos fondos. A xuntanza entre os representantes dos Gobernos autonómicos e do Executivo central para preparar o Consello de Ministros de Pesca da Unión Europea da próxima semana abordou a necesidade de adaptar o marco financeiro de apoio á cadea mar-industria á súa realidade.

A conselleira do Mar, Rosa Quintana, asistiu hoxe ao Consello Consultivo de Pesca para Asuntos Comunitarios no que expuxo as reivindicacións de Galicia de cara ao futuro Fondo Europeo Marítimo e de Pesca (FEMP), que rexerá entre os anos 2021 e 2027. A representante do Executivo galego coñeceu no encontro o acordo acadado con Francia polo que os dous países reclamarán unha maior simplificación do fondo e que se aclaren cuestións que no pasado provocaron retrasos na execución dos fondos. “Temos que facer un FEMP flexible, que prescinda de moita burocracia e dea seguridade xurídica aos nosos profesionais, o que fará máis competitivo o noso sector”, resumiu a titular de Mar.

A xuntanza entre os representantes dos Gobernos autonómicos e do Executivo central para preparar o Consello de Ministros de Pesca da Unión Europea da próxima semana abordou a necesidade de adaptar o marco financeiro de apoio á cadea mar-industria á súa realidade e corrixir disfuncións como a falta de axilidade, simplificación e claridade, unhas demandas que inclúe o acordo acadado con Francia. “Síntome tremendamente satisfeita con ese documento pois as súas liñas xerais están no ditame que presentou o presidente da Xunta no Comité Europeo das Rexións”, salientou Rosa Quintana en referencia ao ditame que foi aprobado por ese organismo e por unanimidade en maio do ano pasado.

Entre os asuntos máis relevantes para Galicia está a necesidade de redefinir o concepto de frota artesanal, que na actualidade se limita a barcos de eslora de ata 12 metros e ao emprego do arrastre, co que queda fóra moita frota de artes menores. “Un único parámetro non debe definir o que se entende por frota artesanal. É difícil explicarlle ao sector que un barco de 12 metros acceda a axudas e outro que pesca na mesma zona, as mesmas especies e coas mesmas artes non pode por ser de 12,5 metros”, lamentou a titular de Mar.

Nesta liña, a representante da Xunta tamén reivindicou a necesidade de axudas a novas construcións e modernizacións de buques, unhas achegas que considera necesarias pois contribuirían a mellorar as condicións de traballo a bordo dos pesqueiros. “Esa mellor habitabilidade do barco non vai aumentar a capacidade pesqueira senón que vai facer máis atractiva a actividade e que a xente nova aposte por ela”, remarcou Rosa Quintana.

A conselleira do Mar tamén lembrou a necesidade de modificar o xeito en que quedarán configuradas as axudas ao sector da transformación no futuro fondo, pois elimínanse as achegas directas e empregaríanse instrumentos financeiros. “Trátase de empresas competitivas que teñen que facer fortes inversións para seguir innovando, para mellorar os procesos e aproveitar a excelente materia prima que temos, polo que é necesario manter esas axudas”, apuntou a representante da Xunta.

Entre as reclamacións de Galicia tamén está a de exixir o incremento da porcentaxe de cofinanciamento do fondo do 75% ao 80% e elevalo ata o 85% no caso concreto de actuacións no marco dos Grupos de Acción Local. Mentres, para accións nas rexións ultraperiféricas, a comunidade defende un cofinanciamento do 100%.

“España ten acreditado o que é facer unha pesca sustentable, con caladoiros nos niveles máximos de explotación, e tamén nos caracterizamos por loitar contra a pesca ilegal, non declarada e non regulamentada. Estamos en condicións de pedir á Comisión e ao Parlamento Europeo que entendan a necesidade de seguir apoiando a este sector tan importante da UE e fundamental nas zonas pesqueiras españolas”, concluíu Rosa Quintana.

R., 2019-05-08

Actualidad

Foto del resto de noticias (natureza.jpg) Unha plataforma de contidos permite que cada parque xestione a súa información que se proxecta ben a través de videowalls, pantallas informativas ou mesas interactivas. A distribución deste equipamento estarse a realizar en base a un estudo previo de necesidades e posibilidades de cada un dos espazos naturais contemplados no proxecto, que inclúe, tamén, solucións de realidade aumentada ou gafas de realidade virtual. Ademais, estes contidos están accesibles desde outras canles como o referido portal Galicia natural e única e a aplicación dos parques. No marco deste proxecto, tanto a web como a app ofrecen xa novas versións.
Foto de la tercera plana (industria-02.jpg) Galicia será unha das primeiras comunidades en dispoñer dun censo do solo empresarial, exhaustivo e actualizado, para facilitar a creación de empresas. Co obxectivo de ter mellor información sobre o total de solo empresarial dispoñible no conxunto da Comunidade, será obrigatoria e gratuíta a inscrición no censo de todas as áreas empresariais existentes en Galicia que teñan parcelas dispoñibles para a súa comercialización e tamén das áreas previstas para o seu inmediato desenvolvemento. Deste xeito, a obriga comprende a todas as áreas empresariais independentemente de que sexan propiedade de persoas físicas ou xurídicas.

Notas

A viola luguesa Iria Fernández Silva ofrecerá este luns no auditorio da Casa do Saber de Lugo, o concerto ‘Vibrando en catro cordas’, no que esta artista luguesa que xa se ten convertido nun valor en alza no ámbito da música de cámara, interpretará un amplo repertorio. O concerto que ofrecerá esta música nada no barrio lugués da Milagrosa encádrase no ciclo de novos talentos artísticos ‘Na Calzada’.
A tempada comezará con 'Divinas palabras', unha peza de Valle-Inclán dirixida por José Carlos Plaza e coa interpretación de María Adánez e Charo López. Virán despois 'La strada' (a versión para teatro do clásico de Fellini dirixida por Mario Gas e cun elenco conformado por Alfonso Lara, Mar Ulldemolins e Alberto Iglesias) e 'Perfectos desconocidos', dirixida por Daniel Guzmán e á que darán vida Alicia Borrachero, Antonio Pagudo, Fernando Soto, Elena Ballesteros, Jaime Zataraín, Ismael Fritschi e Inge Martín.
PUBLICIDAD
Deputación de Ourense
ACTUALIDAD GALICIADIGITAL
Blog de GaliciaDigital
PROMOCIÓN
PUBLICACIONES
Publicaciones
Publicaciones Amencer
Revista Egap
Obradoiro de Artesania