jueves, 2 de mayo de 2024
O presidente do Goberno galego, Alberto Núñez Feijóo, avanzou hoxe a aprobación, no Consello da Xunta, do anteproxecto de Lei de reforzo de actuacións prioritarias que permitirá utilizar o 100% do superávit contable de 2018, 125 millóns de euros, para reforzar o gasto social en Sanidade, Educación e Servizos Sociais públicos.
Durante a súa intervención, Feijóo precisou que esta ferramenta alternativa, legal e que se pode aprobar sen necesidade de autorización do Goberno central, servirá para que Galicia dispoña dunha capacidade de gasto adicional de 130 millóns de euros, xa que ao superávit de 2018 se lle unen outros cinco millóns por aforros de gasto financeiro.
Deste xeito, a través desta lei autorízase un suplemento de crédito que terá un triplo obxectivo: levar a cabo actuacións nos servizos públicos, prioritarias e previstas para os vindeiros anos, e que agora se poderán adiantar xa a 2019; reforzar a atención primaria no Servizo Galego de Saúde, para afrontar a nova planificación e os retos nos vindeiros anos; e todo isto empregando o superávit sen penalizar o cumprimento das regras fiscais para este ano e sen agardar a que España recupere a estabilidade.
En definitiva, pensamos que Galicia non pode agardar máis, non pode verse prexudicada pola inestabilidade da política estatal. E, non pode agardar máis porque ten recursos para facer fronte a actuacións prioritarias e, por iso, o Consello da Xunta vén de aprobar este proxecto de lei, abundou, referíndose, ademais, a varias razóns de operatividade que xustifican a urxencia de que estas actuacións se poidan facer canto antes, como é o feito de que os investimentos en centros educativos e en escolas infantís públicas se teñan que facer no período vacacional de verán; e queremos reforzar o antes posible a Atención Primaria, tanto no eido do persoal como de equipamento, reiterou.
Tralo bo peche do exercicio orzamentario de 2018, o responsable do Executivo autonómico fixo fincapé en que este mecanismo alternativo permitirá acometer unha serie de operacións de reordenación do endebedamento do sector público autonómico que: xera aforros nas cargas fiscais futuras, e posibilita unha serie de dispoñibilidades crediticias que permiten financiar novas actuacións prioritarias. Este novo crédito financiarase reorientando o gasto dedicado a amortizar débeda da Comunidade concretamente, das entidades SPI e Xestur-.
En resumo, utilizaremos o superávit para reducir a débeda da Comunidade e así liberamos créditos orzamentarios cos que financiaremos novos investimentos en Sanidade, Educación e nos Servizos Sociais públicos, sinalou, explicando que deses 130 millóns de euros: 96 estarán recollidos expresamente neste proxecto normativo e se investirán entre este ano e o que vén; e 34 millóns quedarán dispoñibles na Sociedade Pública de Investimentos.
Distribución do superávit deste ano
En relación a distribución do superávit neste 2019, Feijóo precisou que á Sanidade Pública destinaranse 22 millóns para: un aumento en máis de 200 prazas de persoal na Atención Primaria; mellora de equipamento de centros de saúde e hospitais, construción de novos centros de saúde; e mellora do transporte sanitario urxente. Isto supón, en definitiva, na Sanidade pública máis de 40 millóns de euros entre o ano 2019 e 2020, detallou.
No eido da Educación Pública, este ano investiranse 22,7 millóns na mellora de instalacións, con actuacións en 22 colexios e institutos. E, en relación aos Servizos Sociais Públicos, destinaranse 6,2 millóns de euros a actuacións de mellora das instalacións das escolas infantís, centros de maiores e residencias. Así mesmo, destinarase unha achega de 3 millóns de euros para actuacións no medio rural.
Cómpre subliñar que parte das actuacións encadraranse como investimentos financeiramente sostibles, polo que a súa execución non afectará ao cumprimento da regra de gasto neste 2019, tal como permite o real decreto que o Goberno aprobou a instancias de Galicia.
Con esta lei investiremos, polo tanto, 96 millóns de euros: 48 millóns este ano e outros 48 millóns en 2020. E, a maiores, quedará dispoñible unha capacidade adicional de investimentos doutros 34 millóns -17 millóns cada ano-, que non teñen que formar parte desta lei e cos que se financiarán outras actuacións ao longo do exercicio a través da Sociedade Pública de Investimentos, dixo a modo de resumo.
Logo de precisar que o documento será remitido inmediatamente ao Parlamento, Feijóo concluíu lembrando que Galicia vén sendo na última década a comunidade autónoma de referencia no cumprimento das regras fiscais.
O director xeral de Relacións Exteriores e coa UE, Jesús Gamallo, reuniuse esta mañá cos responsables da AECT Rio Minho para coñecer de primeira man as prioridades e os proxectos que ten en marcha este instrumento de cooperación que abrangue 16 concellos da provincia de Pontevedra e 10 da CIM Alto Minho. Esta é unha primeira visita que o director xeral de Relacións Exteriores e coa UE, Jesús Gamallo, continuará co resto de AECTs. Deste xeito, está previsto que se entreviste tamén cos responsables da AECT Chaves-Verín, e da futura AECT da Raia Seca.
A Cidade da Cultura volve acoller a colorida e festiva carreira Holi Gaiás, que vai pola súa sexta edición. A proba terá lugar o 8 de xuño nos exteriores do complexo e contará cun percorrido especial para a cativada entre 4 e 9 anos, a Peque Holi. A actividade contará un ano máis coa súa tradicional poeira de cores e con animación previa e posterior á proba, con música e coreografías que animarán aos participantes. O obxectivo é gozar coa práctica deportiva nun enclave como é Gaiás, coa súa característica arquitectura e co seu gran pulmón verde, o Bosque de Galicia.
