domingo, 8 de noviembre de 2026
O conselleiro de Cultura e Turismo, Román Rodríguez, asistiu na biblioteca Anxel Casal á apertura da exposición Antonio Fraguas, memoria dun soño. Viaxe a unha Galicia orgullosa de si mesma, conmemorativa das Letras Galegas 2019, e na que estiveron presentes familiares do escritor, o presidente da Fundación Antonio Fraguas Fraguas, Justo Beramendi; o presidente da Real Academia Galega, Víctor Freixanes, a presidenta do Consello da Cultura Galega, Rosario Álvarez, e representantes dos concellos de Cerdedo-Cotobade e de Santiago de Compostela.
A mostra consta dun cuadríptico explicativo e paneis que percorren a vida de Antonio Fraguas e, ao tempo, vanse ofrecendo datos acerca da sociedade, da economía ou da política de cada momento histórico, que axudan a comprender a súa figura e a súa obra.
O conselleiro de Cultura e Turismo destacou de Fraguas que foi un soñador cos pés na terra, porque sempre tivo a Galicia como norte e traballou por ela incansablemente. Hoxe, a través desta mostra, celebramos a súa traxectoria honesta e leal coa súa terra e a súa cultura, engadiu Román Rodríguez, quen destacou o acerto da Real Academia Galega na súa decisión de distinguir a Fraguas outorgándolle unha das máis altas honras a que pode aspirar unha persoa do ámbito da cultura en Galicia: a homenaxe do Día das Letras Galegas. Neste acto de apertura tamén participaron o secretario xeral de Política Lingüística, Valentín García, e o director xeral de Políticas Culturais, Anxo Lorenzo.
Percorrido pola vida de Antonio Fraguas
A exposición amosa un total de 12 paneis que achegan ao visitante á persoa de Antonio Fraguas. Deste xeito, o panel Universo Insuela fai referencia á infancia e ao contacto que Antonio Fraguas tivo desde o berce coa cultura popular. En O destino non estaba escrito preséntase un punto de xiro na vida daquel neno que parecía abocado a emigrar ao Brasil e Pontevedra, o primeiro agromar galeguista fala dos seus anos como alumno de secundaria e da decisiva influencia dos profesores que atopou na cidade do Lérez, como Castelao, Sobrino Buhigas ou Losada Diéguez. Así mesmo, Santiago, a cidade no corazón, aborda a súa etapa como estudante universitario, que trae o ingreso no Seminario de Estudos Galegos e nas Irmandades da Fala.
Por outra banda, Docencia e compromiso céntrase na vocación docente do autor e no seu activismo cultural na Estrada nos anos previos á Guerra Civil. Esta, xunto coas súas nefastas consecuencias para Antón Fraguas e as súas aspiracións galeguistas, trátanse no panel titulado Medo e reconstrución. Mentres, Fraguas, a paixón polo coñecemento, dedícase ao Fraguas polígrafo que ten a Galicia como obxecto de interese en todos os campos de estudo que aborda e outro dos paneis detense no que foi, de todos os ámbitos aos que se dedicou, aquel en que destacou especialmente: o de investigador, divulgador e valedor da cultura popular. Continuando o percorrido pola mostra, o visitante atopará o panel Un museo para a alma de Galicia, que amosa o papel de Antonio Fraguas na xestación e primeiros pasos do Museo do Pobo Galego, do que foi director. No indicador Ás veces, os soños cúmprense, compróbase como, nos derradeiros anos da súa vida, Antonio Fraguas viu como comezaba a materializarse aquel vello soño da autonomía para Galicia, en cuxas institucións culturais el participou e das que recibiu un amplo recoñecemento.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
