lunes, 7 de julio de 2025
O conselleiro de Cultura e Turismo, Román Rodríguez, participou hoxe na apertura do Consejo de Patrimonio Histórico que se celebra estes días no Mosteiro de Santo Estevo de Ribas de Sil, na Ribeira Sacra. Integran esta reunión, que está presidida polo director xeral de Belas Artes do Ministerio de Cultura e Deporte, Román Fernández-Baca, os directores xerais de Patrimonio Cultural de todas as comunidades autónomas.
Na súa intervención, o titular de Cultura e Turismo salientou os valores da Ribeira Sacra e o intenso e importante traballo técnico que desde a Administración autonómica se vén realizando para definir todos os aspectos da candidatura da Ribeira Sacra para que sexa incluída na Lista do Patrimonio Mundial da Unesco.
Quero lembrar que nos encontramos nunha zona que destaca polo seu patrimonio natural, pero tamén polo seu importante patrimonio arquitectónico, subliñou Román Rodríguez que, ademais, explicou que na Ribeira Sacra existe unha das maiores concentracións de construcións relixiosas de estilo románico de Europa. Podemos atopar nesta zona máis de 1.200 bens singulares e é precisamente a amplitude e riqueza destes bens a que fai que na Xunta confiemos nesta candidatura, sinalou.
Despois da apertura da sesión, na que tamén participou o alcalde do Concello de Nogueira de Ramuín, José César Parente Pérez, o presidente da Deputación de Ourense, Manuel Baltar, e o deputado da área de Goberno Interior e Relacións Institucionais da Deputación de Lugo, Álvaro Santos, os membros do Consejo comezaron a súa reunión. A orde do día inclúe a exposición por parte do equipo da Dirección Xeral de Patrimonio Cultural da Xunta de Galicia dos aspectos técnicos da candidatura da Ribeira Sacra.
Consejo de Patrimonio Histórico
Este órgano entre a Administración do Estado e as Comunidades Autónomas ten como finalidade especial facilitar a comunicación e o intercambio de programas de actuación e información relativos ao Patrimonio Cultural Español e nel están representados todos os directores xerais con competencias en materia do patrimonio cultural das distintas autonomías españolas, xunto cos representantes do Ministerio de Cultura e Deporte.
EuroPCom, a Conferencia Europea de Comunicación Pública, é a maior reunión anual de expertos en comunicación pública de Europa organizada polo Comité Europeo das Rexións en colaboración coa Comisión Europea, o Parlamento Europeo, o Consello, o Banco Europeo de Investimentos, o Comité Económico e Social Europeo e a Organización para a Cooperación e o Desenvolvemento Económicos. O evento ofrece unha plataforma para explorar as últimas tendencias, iniciativas e ideas no ámbito da comunicación pública. O director xeral de Relacións Exteriores e coa Unión Europea, Jesús Gamallo, participou nesta Conferencia organizada polo Comité Europeo das Rexións, e celebrada baixo o lema 'Máis alá das palabras. Unha historia de confianza'.
O Diario Oficial de Galicia publica hoxe a declaración de Ben de Interese Cultural da Rapa das Bestas de Sabucedo por considerar acreditado o seu valor sobranceiro como patrimonio inmaterial do pobo galego, ao tratarse dunha das festas máis antigas de Galicia que conta, como mínimo, con tres séculos de historia. Este recoñecemento supón a aplicación de inmediato do réxime de tutela da Lei de Patrimonio Cultural e, polo tanto, o maior nivel de protección. Esta distinción, que se suma á de Festa de Interese Turístico Internacional acadada en 2007, chega tras o visto e prace a este decreto por parte do Consello da Xunta este pasado luns, 30 de xullo, e logo de completarse o expediente administrativo, no que constan os dous informes preceptivos dos órganos consultivos favorables.
