martes, 22 de septiembre de 2026
O conselleiro de Sanidade, Jesús Vázquez Almuiña, anunciou hoxe que Ferrol contará antes do verán cunha unidade de diagnóstico e asesoramento das patoloxías derivadas da exposición ao asbesto de referencia para todos os pacientes que teñen cobertura do Sergas. Case a práctica totalidade dos casos destas patoloxías concéntrase na área sanitaria ferrolá.
Almuiña afirmou que para esta nova unidade vaise contratar un neumólogo, un profesional de enfermería e un auxiliar de enfermería, ademais dun auxiliar administrativo. Tamén se contempla a adquisición de equipamento específico para a realización de probas complexas.
En concreto, Almuiña referiuse aos obxectivos estratéxicos que persegue esta unidade e entre os que destacou a ampliación da carteira de servizos, conseguir unha óptima coordinación asistencial con atención primaria, garantir a seguridade das intervencións ou fomentar a investigación clínica de alto nivel. Tamén mencionou a orientación da actividade cara ás necesidades dos pacientes, asegurando a equidade no proceso de atención sanitaria.
A creación desta unidade tamén dará resposta ás demandas realizadas dende a Asociación galega de vítimas do amianto (AGAVIDA) e das organizacións sindicais participantes na comisión de seguimento do programa de traballadores expostos ao asbesto, constituída na EOXI de Ferrol.
Actualmente, dixo o conselleiro, existe unha consulta específica para atender ás persoas afectadas pola exposición ao asbesto, que conta cun neumólogo e outro persoal sanitario como un profesional de enfermería e un auxiliar. Nela son atendidos anualmente arredor de 1.050 pacientes con 1.100 consultas, 1.077 probas de función respiratoria, 193 tomografías computerizadas (TACs) e 608 radiografías de tórax.
Almuiña lembrou que en Galicia xa se está desenvolvendo dende o ano 2001un Programa Integral de vixilancia da saúde dos traballadores que estiveron expostos o asbesto. Por unha banda elaborouse un rexistro no que se incluíron tanto os traballadores activos como os que xa estaban de baixa das empresas, sempre coa idea de que un diagnóstico correcto e un manexo temperán son puntos clave para o prognóstico da enfermidade.
Por outra banda, creouse o programa específico de seguimento de postexpostos polo que se remitiron cartas dirixidas tanto aos traballadores afectados como aos profesionais que debían avalialos para iniciar recoñecementos médicos, e con indicación de que as patoloxías detectadas debían derivarse ao hospital para seguimento.
O Consello da Xunta analizou na súa reunión de hoxe un informe da Consellería do Medio Rural sobre o anteproxecto de Lei de loita contra os incendios forestais de Galicia (LLCIF), antes da súa remisión para consulta ao Consello Forestal de Galicia, cuxa reunión está prevista para mañá martes. A futura normativa prioriza reforzar a protección da poboación e a xestión integral do territorio. O presidente do Goberno autonómico, Alfonso Rueda, lembrou que actual lexislación sobre incendios forestais 'ten case 20 anos' e 'cómpre actualizarla e adaptala aos novos tipos de lumes así como aos avances que houbo tanto na loita como na prevención de incendios'.
Galicia é a rexión que máis solicitudes presentou en Europa para participar en proxectos interrexionais de I+D+i. Así o indican os datos da Vanguard Initiative, alianza europea da que a nosa Comunidade forma parte, xunto a outras rexións, para estimular o crecemento europeo da I+D+i a través da colaboración entre territorios de distintos países e a especialización intelixente. Precisamente a Xunta vén de publicar a convocatoria VInnovate Galicia, unha liña de axudas para organismos de investigación e empresas que presenten proxectos con outras rexións. Para poder candidatar á convocatoria VInnovate Galicia da Xunta, cuxo prazo de presentación de propostas está aberto desde hoxe ata o 19 de outubro, os posibles participantes teñen que presentarse antes á fase europea.
