martes, 22 de septiembre de 2026
O conselleiro de Cultura e Turismo, Román Rodríguez, reuniuse con representantes de diversos museos da comunidade para avanzarlles o inicio do proceso de elaboración da Lei de Museos de Galicia. O CGAC acolleu este encontro de traballo ao que asistiu tamén o director xeral de Políticas Culturais, Anxo M. Lorenzo, e que serviu para establecer unha toma de contacto co sector museístico.
Preto de 30 institucións culturais de toda Galicia participaron nesta primeira xuntanza na que se solicitou a participación e se escoitaron as primeiras achegas técnicas dos profesionais involucrados nas actividades museísticas. Neste caso, trátase de acadar un proceso participativo e transparente, escoitando as opinións e achegas de todos os integrantes do ecosistema galego de museos.
O obxectivo da nova lei, como expuxo o conselleiro, será impulsar a planificación estratéxica e a cooperación para converter os museos galegos nun recurso cultural e económico máis eficiente e adaptado aos tempos. O texto, que deberá definir as funcións, liñas de acción relativas á xestión e o fomento, e establecer os deberes dos centros museísticos galegos na súa ampla casuística, pretende quedar consolidado como texto legal antes de que remate 2019.
Institucións de referencia
Os museos desempeñan unha importante función na súa condición de espazos para a transmisión cultural, o diálogo intercultural, a aprendizaxe, o debate, a formación, a cohesión social e o desenvolvemento sustentable. Ademais, apoian a actividade económica local, en particular, por conduto das industrias culturais e creativas e o turismo.
O encontro permitiu constatar que a sociedade cambiou e tamén cambiaron os públicos. Os museos, como centros dinámicos conectados coa sociedade, tamén mudaron os hábitos de consumo e de acceso á cultura, o que dalgún xeito obriga a redefinir os contidos, as prioridades e os procedementos de traballo nas institucións museísticas para adecuarse aos novos tempos e demandas actuais.
No marco da reunión tamén se abordou a importancia que os diversos centros museísticos galegos van ter no marco da celebración do vindeiro Xacobeo 21. Haberá unha actividade expositiva específica e novas propostas e proxectos que enriquecerán a programación cultural deste gran evento, de xeito que chegue ao meirande número posible de concellos e comarcas de Galicia.
O Consello da Xunta analizou na súa reunión de hoxe un informe da Consellería do Medio Rural sobre o anteproxecto de Lei de loita contra os incendios forestais de Galicia (LLCIF), antes da súa remisión para consulta ao Consello Forestal de Galicia, cuxa reunión está prevista para mañá martes. A futura normativa prioriza reforzar a protección da poboación e a xestión integral do territorio. O presidente do Goberno autonómico, Alfonso Rueda, lembrou que actual lexislación sobre incendios forestais 'ten case 20 anos' e 'cómpre actualizarla e adaptala aos novos tipos de lumes así como aos avances que houbo tanto na loita como na prevención de incendios'.
Galicia é a rexión que máis solicitudes presentou en Europa para participar en proxectos interrexionais de I+D+i. Así o indican os datos da Vanguard Initiative, alianza europea da que a nosa Comunidade forma parte, xunto a outras rexións, para estimular o crecemento europeo da I+D+i a través da colaboración entre territorios de distintos países e a especialización intelixente. Precisamente a Xunta vén de publicar a convocatoria VInnovate Galicia, unha liña de axudas para organismos de investigación e empresas que presenten proxectos con outras rexións. Para poder candidatar á convocatoria VInnovate Galicia da Xunta, cuxo prazo de presentación de propostas está aberto desde hoxe ata o 19 de outubro, os posibles participantes teñen que presentarse antes á fase europea.
