martes, 1 de julio de 2025
O Pazo de María Pita acolleu esta mañá a presentación da 23ª edición dos premios do teatro galego María Casares, cuxa gala terá lugar o vindeiro xoves, 21 de marzo, ás 20.30 horas no Teatro Rosalía Castro. O concelleiro de Culturas, Deporte e Coñecemento, José Manuel Sande, valorou positivamente a celebración, un ano máis na cidade, da gran festa do teatro galego, un acto máis que relevante para este Concello, e que dará conta do nivel de excelencia das nosas artes escénicas. O concelleiro de Culturas, quen saudou a elección de David Rubín como autor do cartel desta edición, estivo acompañado na presentación
pola vicepresidenta da Deputación, Goretti Sanmartín; o director da Axencia Galega de Industrias Culturais, Jacobo Sutil; a vicepresidenta da Asociación de Actores e Actrices de Galicia (AAAG), Mabel Rivera; o presidente do Consello Territorial da SGAE, Juan Rivas, e dos actores coruñeses Juanillo Esteban e Carlos Sante, que serán os responsables de dirixir unha gala que se poderá seguir, ao vivo, desde as 20.30 horas a través da canle de Youtube da AAAG xa que, tal e como apuntou Mabel Rivera, este ano a gala non se emitirá na canle pública galega. Tomamos esta decisión ante o feito de que non haxa posibilidade de retransmitir a cerimonia en directo, logo de anos facéndoo de madrugada. Estamos a falar cun trato desfavorable, por parte da administración autonómica, a unha actividade pioneira na transmisión de valores culturais en galego, como é o noso teatro, aseverou a actriz.
Un total de doce espectáculos finalistas competirán polos galardóns. Commedia, de Contraproduccións, opta a un total de 12 premios do teatro galego; Divinas Palabras Revolution, do Centro Dramático Galego, é finalista en 7 categorías, e A leituga, de Emedous, aspira a acadar 5 galardóns. Ademais, outras pezas como Invisibles, de Redrum Teatro, e A Casa ORei, de Ibuprofeno Teatro, optan a 4 premios. A obra O servidor de dous amos, de Talía Teatro, é finalista en 3 modalidades, mentres que montaxes coma #Camiños, Anatomía dunha serea, ou A nena e o grilo competirán en 2 categorías. Completan o cadro de finalistas Arnoia Arnoia, Contos do Recreo e Patapatúm. Este ano, por primeira vez, non se entregarán as tradicionais xerras de Sargadelos, que se substituirán por un trofeo deseñado por Paula Pereira como protesta da AAAG polas actuacións da dirección da empresa fronte ao seu cadro de persoal. Como asociación valoramos o diálogo á hora de solventar conflitos laborais e cumprimentos. Apostamos pola conversa e parécenos que non se está a abordar así desde a fábrica, apuntou Rivera.
Durante a gala, na que as Aulas de Teatro Universitario de Vigo e Ourense recibirán este ano o Premio de Honra Marisa Soto, o actor Carlos Santiago dará lectura ao Manifesto Galego do Día Mundial do Teatro. Pola súa banda, tanto Estaban como Sande salientaron a participación na cerimonia de actrices e actores con bagaxe nas artes circenses, ademais de rostros recoñecidos da escena teatral galega. Será unha gala de época e dinámica, que trasladará ao público a un pasado glorioso a través da mistura do teatro e circo, apuntaron durante a presentación.
A primeira fase do piloto do proxecto Xenoma Galicia permitiu detectar, entre os máis de 1.000 participantes aos que se lle recolleu unha mostra de sangue, 14 novos casos de alto risco para as patoloxías investigadas de cancro de mama e ovario hereditario, síndrome de Lynch e hipercolesterolemia familiar. A Consellería de Sanidade presentou esta mañá ante o Consello da Xunta un informe de situación do piloto do proxecto Xenoma Galicia. Cun investimento de 20 millóns de euros, o Goberno galego márcase o obxectivo de recompilar o ADN de 400.000 persoas. Pola porcentaxe de poboación incluída, Xenoma Galicia é un dos proxectos de maior envergadura do mundo. Permitirá ofrecer tratamentos farmacolóxicos individualizados, predicir o risco de enfermidades antes de apareceren para poder anticiparse a elas e evitalas grazas ao estudo do xenoma e da historia clínica.
No marco do Plan de Actuacións fronte aos posibles efectos das altas temperaturas sobre a saúde, a Xunta de Galicia vén de rebaixar a alerta por altas temperaturas aos niveis 1 e 2. Deste xeito, a vaga de calor iniciada pasado venres, que na xornada de onte acadou o nivel 3 de alerta en diversas áreas de Galicia, agora queda establecida nos dous primeiros niveis de alerta. En concreto, as zonas que ficarán no nivel 2 son o noroeste de Ourense, o interior de Pontevedra, así como o Centro e a Montaña da provincia de Lugo. Pola súa banda, defínese o nivel de alerta 1 por vaga e calor as zonas do interior de Coruña, o sur de Lugo, Miño de Ourense, montaña de Ourense, sur de Ourense, Valdeorras, litoral de Pontevedra e a zona Miño de Pontevedra.
