domingo, 6 de julio de 2025
O conselleiro de Cultura e Turismo, Román Rodríguez, presentou esta mañá en rolda de prensa a mostra de Angela de la Cruz que se inaugura este serán, a partir das 20,00 horas, no Centro Galego de Arte Contemporánea (CGAC) e na que se fai un percorrido polos momentos máis importantes na traxectoria da artista. Ademais do titular de Cultura e Turismo e da artista Angela de la Cruz, no acto de presentación tamén participaron o director xeral de Políticas Culturais, Anxo Lorenzo, o director do CGAC, Santiago Olmo, e a comisaria da exposición, Carolina Grau.
O título da nova exposición de Angela de la Cruz fai referencia a Homeless (Sen fogar, 1996), unha das primeiras obras que realizou a artista rompendo o bastidor que contén o lenzo para converter en tridimensional a peza plana, borrando os límites entre a pintura e a escultura. En palabras da artista é unha escultura utilizando a linguaxe da pintura e viceversa. É unha pintura e unha escultura.
O título tamén suxire un tema que segue sendo tan importante hoxe como o foi hai máis de vinte anos e que se vencella coa preocupación da artista pola actualidade, a desigualdade social, a situación política ou os efectos do cambio climático.
Outra característica da súa obra é a continua reciclaxe que fai dela e que nesta mostra ten a súa expresión na peza Extensión, na que por unha banda temos a pintura recentemente feita, co seu bastidor intacto e, colgando dela, un vello postizo a modo de extremidade en desuso.
As 25 obras que reúne esta exposición representan momentos clave na traxectoria de Angela de la Cruz e reflicten o desenvolvemento da súa linguaxe artística nos últimos vinte anos. Para facelo, exponse un percorrido polo traballo que realizou entre os anos 1996 e 2018, creando asociacións con obras das distintas épocas e sen seguir unha orde cronolóxica. Cómpre destacar tamén que a maioría das obras presentadas non se amosaron de maneira retrospectiva anteriormente.
Deste xeito, durante o percorrido pola mostra o público poderá apreciar a evolución da linguaxe artística de Angela de la Cruz ao observar desde obras realizadas con diversas pezas de mobiliario, nunha opción de reciclaxe e experimentación con obxectos da súa propia escala, que se incorporan á súa produción desde o ano 2000, como ocorre en Still Life (with Table); ata o último material que a artista inclúe ‒unha peza de aluminio pintado, Crate (Burgundy) de 2017.
A arquitectura de Siza no Centro Galego de Arte Contemporánea é determinante para a disposición da exposición, definindo o principio e o fin desta, marcados xa desde a propia entrada ao centro, onde o hall serve como o primeiro espazo da mostra ofrecendo as persoas visitantes, coa súa luminosidade, unha especie de transición suave cara ao espazo das salas de exposición do museo.
Angela de la Cruz (A Coruña, 1965)
Angela de la Cruz é a artista galega de meirande recoñecemento internacional da súa xeración e en 2017 recibiu o Premio Nacional de Artes Plásticas. Licenciada en Filosofía e Letras pola Universidade de Santiago de Compostela, Angela da Cruz trasládase a mediados dos anos oitenta a Londres, cidade onde realizará estudos de arte no Chelsea College of Art, Goldsmiths College e Slade School of Art, e na que reside e desenvolve o seu traballo.
A finais dos anos noventa prodúcese un punto de inflexión na súa carreira grazas ao proxecto Larger than Life (1998), un enorme lenzo retorto dentro dun xigantesco bastidor que se apodera por completo do espazo que o contén. Concibido para ser exposto na pista de baile do Royal Festival Hall, a obra fascinou a crítica e público e supuxo o recoñecemento de quen hoxe é considerada a artista española máis importante no eido internacional, un recoñecemento que se confirmou coa súa selección en 2010 como finalista do Turner Prize.
Desde finais dos anos noventa participou en numerosas exposicións individuais e colectivas e o seu traballo está representado en coleccións como a da Fundació La Caixa de Barcelona, o Moderna Museet de Estocolmo, National Gallery of Victoria de Melbourne, Tate Collection ou, en Galicia, na Fundación Barrié.
Ademais, ao longo da súa carreira, Angela de la Cruz recibiu distintos recoñecementos como o Premio Nacional de Artes Plásticas ou a nomeamento á mellor exposición en Cataluña por Escombros, La Panera, ambos no ano 2017.
EuroPCom, a Conferencia Europea de Comunicación Pública, é a maior reunión anual de expertos en comunicación pública de Europa organizada polo Comité Europeo das Rexións en colaboración coa Comisión Europea, o Parlamento Europeo, o Consello, o Banco Europeo de Investimentos, o Comité Económico e Social Europeo e a Organización para a Cooperación e o Desenvolvemento Económicos. O evento ofrece unha plataforma para explorar as últimas tendencias, iniciativas e ideas no ámbito da comunicación pública. O director xeral de Relacións Exteriores e coa Unión Europea, Jesús Gamallo, participou nesta Conferencia organizada polo Comité Europeo das Rexións, e celebrada baixo o lema 'Máis alá das palabras. Unha historia de confianza'.
O Diario Oficial de Galicia publica hoxe a declaración de Ben de Interese Cultural da Rapa das Bestas de Sabucedo por considerar acreditado o seu valor sobranceiro como patrimonio inmaterial do pobo galego, ao tratarse dunha das festas máis antigas de Galicia que conta, como mínimo, con tres séculos de historia. Este recoñecemento supón a aplicación de inmediato do réxime de tutela da Lei de Patrimonio Cultural e, polo tanto, o maior nivel de protección. Esta distinción, que se suma á de Festa de Interese Turístico Internacional acadada en 2007, chega tras o visto e prace a este decreto por parte do Consello da Xunta este pasado luns, 30 de xullo, e logo de completarse o expediente administrativo, no que constan os dous informes preceptivos dos órganos consultivos favorables.
