lunes, 7 de julio de 2025
O presidente da Xunta, Alberto Núñez Feijóo, destacou hoxe que 2018 foi o mellor ano do naval na última década porque Galicia, salientou, representa a metade do sector en España, converténdose na comunidade de referencia neste eido.
Durante a primeira reunión preparatoria da vindeira cita Navalia 2020, Feijóo afirmou que o éxito desta feira vai estar apoiada polo mellor momento da industria naval galega, ao que precisou que o sector galego ten, actualmente, en carteira 27 buques, un 49% do total dos buques contratados en España. E só en 2018, conseguiu 15 novos contratos, o que supón o 63% de todos os contratos acadados polo naval español.
O responsable do Goberno galego valorou estes datos como o mellor reclamo para as moitas empresas que se dan cita nesta feira, así como o éxito de convocatoria da pasada edición, que foi a máis concorrida de todas as celebradas ata o de agora: con máis de 600 marcas representadas en 400 expositores que visitaron 25.000 persoas; e cun impacto económico na cidade que acadou os 11 millóns.
Nesta liña, Feijóo expresou o convencemento de que a vindeira cita de 2020 superará novos récords. Non en van, xa está ao 80% de ocupación con respecto á última edición; os pavillóns 1 e 2 de Ifevi están practicamente cheos e xa se está a comercializar o novo, froito da ampliación levada a cabo pola Xunta.
Ao longo da súa intervención, o titular da Xunta garantiu o apoio da Administración autonómica a esta feira, ao igual que o está a facer co sector, tanto no eido da innovación e diversificación -con cinco unidades mixtas que neste momento están centradas no naval, cun orzamento que está a mobilizar 12,2 millóns-; como no da formación, cun plan específico, dotado con 12 millóns de euros e con máis de 2.800 traballadores que xa se levan formado en máis de 240 cursos, co obxectivo de chegar aos 5.000.
O presidente do Goberno galego incidiu en que o bo momento que está a atravesar o sector se debe en parte á diversificación, á súa capacidade para adaptarse aos novos tempos, innovar tecnoloxicamente e poder así dar resposta ás novas exixencias e tendencias do sector, referíndose, por exemplo, ao segmento dos cruceiros e a como estaleiros como Barreras xa están a orientar a súa produción cara aí, ou a Navantia Fene, que se está a posicionar como referente en eólica offshore.
EuroPCom, a Conferencia Europea de Comunicación Pública, é a maior reunión anual de expertos en comunicación pública de Europa organizada polo Comité Europeo das Rexións en colaboración coa Comisión Europea, o Parlamento Europeo, o Consello, o Banco Europeo de Investimentos, o Comité Económico e Social Europeo e a Organización para a Cooperación e o Desenvolvemento Económicos. O evento ofrece unha plataforma para explorar as últimas tendencias, iniciativas e ideas no ámbito da comunicación pública. O director xeral de Relacións Exteriores e coa Unión Europea, Jesús Gamallo, participou nesta Conferencia organizada polo Comité Europeo das Rexións, e celebrada baixo o lema 'Máis alá das palabras. Unha historia de confianza'.
O Diario Oficial de Galicia publica hoxe a declaración de Ben de Interese Cultural da Rapa das Bestas de Sabucedo por considerar acreditado o seu valor sobranceiro como patrimonio inmaterial do pobo galego, ao tratarse dunha das festas máis antigas de Galicia que conta, como mínimo, con tres séculos de historia. Este recoñecemento supón a aplicación de inmediato do réxime de tutela da Lei de Patrimonio Cultural e, polo tanto, o maior nivel de protección. Esta distinción, que se suma á de Festa de Interese Turístico Internacional acadada en 2007, chega tras o visto e prace a este decreto por parte do Consello da Xunta este pasado luns, 30 de xullo, e logo de completarse o expediente administrativo, no que constan os dous informes preceptivos dos órganos consultivos favorables.
