Noticias

Feijóo salienta que Galicia cumpriu en 2018 os tres obxectivos de estabilidade e avanza que pedirá ao Goberno central autorización para reinvestir o superávit

É dicir, con máis ingresos que gastos, grazas ao bo comportamento dos ingresos tributarios, a consecuencia da recuperación económica e pola chegada de ingresos extraordinarios; e, pola liquidación do período de fondos comunitarios 2007-2013.

Precisou que se trata dunha situación inédita na última década, xa que é a primeira vez, desde 2002, que Galicia acada superávit contable. O responsable da Administración autonómica incidiu na importancia de poder reutilizar, logo dunha planificación, ese superávit á investimentos financeiramente sostibles. “Galicia quere utilizar estes 125 millóns en investimentos en materia de sanidade, en materia de educación e en materia de servizos sociais,” sentenciou.

En canto ao límite da débeda, o presidente da Xunta subliñou ademais que en 2018 Galicia conseguiu reducir o seu endebedamento por segundo ano consecutivo, ata baixar a ratio ao 18,07%, por debaixo do límite do 18,4% autorizado polo Consello de Política Fiscal e Financeira, o que consolida á Comunidade como a autonomía que menos incrementou o seu volume de débeda pública nos últimos dez anos.

“Neste momento estamos entre as catro comunidades con menos débeda de toda España, cando no ano 2008 estabamos entre as catro con máis débeda. E, grazas a isto, evitamos a emisión duns 4.000 millóns de euros de débeda”, dixo, precisando que o obxectivo para este 2019 é seguir na senda da redución do endebedamento.

Como terceiro punto, o responsable do Goberno galego sinalou que o informe ratifica tamén que en 2018 Galicia axustouse ao límite da regra de gasto, un mecanismo que ten como obxectivo evitar consolidacións procíclicas de gasto na Administración, evitando un aumento excesivo dos gastos estruturais que, en épocas de dificultade non poidan ser afrontados. “É dicir, evitar os erros do pasado que levaron á crise”, explicou, precisando que Galicia cumpriu en 2018 a regra de gasto, que para ese exercicio era do 2,4%, evitando a aprobación dun plan de axuste, obrigatorio cando unha administración a incumpre.

Como consecuencia disto, Feijóo lembrou que Galicia mantén intacto o seu autogoberno, pode conceder avais ás empresas para seguir medrando e pode utilizar unha taxa de reposición de efectivos públicos do 108%, o que se traduce en máis prazas nas oposicións, como se está a ver nestas últimas semanas.

Por último, o titular da Xunta aseverou que o documento acredita ademais que Galicia volveu ser en 2018 a comunidade de referencia no pagamento a provedores, cun tempo medio de pago de 13,3 días, é dicir, 22 días antes que a media autonómica (35,3 días) e 16,7 días por debaixo do límite de 30 días que establece a lexislación estatal. Feijóo lembrou que “Galicia é a maior pagadora de toda a Comunidade, aboando cada ano unhas 550.000 facturas”

“En resumo, Galicia cumpriu un ano máis os obxectivos de estabilidade orzamentaria: cumprimos déficit, débeda, regra de gasto e pagamento a provedores e, en 2018, Galicia achegou solvencia ao conxunto de España. E, por esa razón, queremos que o Goberno nos permita utilizar o superávit contable para aprobar neste 2019 un plan de novos investimentos a prol dos galegos”, abundou.