viernes, 6 de noviembre de 2026
O presidente do Goberno galego, Alberto Núñez Feijóo, destacou hoxe a aprobación do complemento extraordinario de 206 euros para os perceptores das pensións máis baixas.
Un complemento, dixo, do que se beneficiarán 39.000 galegas e galegos entre perceptores de pensións non contributivas, do Fondo de Asistencia Social e do Subsidio de Garantía de Ingresos Mínimos.
Sobre este punto, Feijóo aseverou que esta axuda se ingresará de oficio a todos os beneficiarios que reúnan os anteditos requisitos, sen necesidade de que a soliciten nin realicen ningún trámite adicional. Ademais, explicou que estes 206 serán abonados nun único pagamento nos dez primeiros días do mes de xaneiro.
Trátase, incidiu, dun complemento de excepcional importancia polo colectivo ao que beneficia. Nese sentido, o presidente da Xunta lembrou que son poucas as Comunidades Autónomas que aínda manteñen este complemento adicional á pensión non contributiva.
En definitiva, o Goberno galego amosa así o seu compromiso coas persoas que máis o necesitan: pensionistas de xubilación e invalidez na súa modalidade non contributiva, persoas anciáns e enfermas con incapacidade para o traballo beneficiarias de axudas periódica e ás persoas con minusvalía que perciben o subsidio de garantía de ingresos mínimos, concluíu.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
