sábado, 7 de noviembre de 2026
Esa foi a proposta acordada hoxe no seo da reunión da Comisión Mixta entre o Tribunal Superior de Xustiza de Galicia (TSXG) e a Xunta de Galicia, na que participaron o vicepresidente do Goberno galego, Alfonso Rueda, e o presidente do TSXG, Miguel Ángel Cadenas.
Na última Conferencia Sectorial, Galicia solicitou ao Ministerio de Xustiza a creación de novos xulgados. En resposta a esta solicitude, o Goberno estatal vén de trasladar que Galicia poderá contar con tres unidades xudiciais, unha cifra que a Administración Autonómica considera insuficiente.
Tendo en conta os datos obxectivos de cargas de traballo e pendencia, Xunta e TSXG acordaron priorizar o reforzo dos xulgados do Social, que é a xurisdición con máis carga de traballo. Por iso, solicitarase creación destes xulgados en Vigo, Lugo e Santiago de Compostela, que a Xunta está en disposición de poñer en marcha en canto o Ministerio faga efectiva a súa creación por decreto.
Con todo, Galicia trasladaralle ao Ministerio a necesidade de crear novos xulgados e a súa disposición a poñer en marcha aínda máis unidades xudiciais, a maiores das solicitadas, se algunha comunidade autónoma renuncia ás súas ou se se decide finalmente crear un maior número.
Cómpre recordar que o ano pasado creáronse un xulgado do Social na Coruña; un xulgado de Primeira Instancia en Ferrol; outro de Primeira Instancia en Ourense; e outro en Vigo, especializado en Familia.
Plan de recuperación de traballo
A creación de novos xulgados non foi o único tema que se tratou na reunión de hoxe. Durante o encontro, tamén se fixo balance do Plan de recuperación de traballo nos xulgados tras a folga. A súa primeira fase tivo lugar antes do verán, e a segunda fase comezou o pasado 15 de outubro en xulgados prioritarios e xa se atopa estendido a todos os órganos xudiciais, fiscalías, Imelga, e servizos xudiciais.
Está previsto que o Plan se leve a cabo ata finais de ano, e no que se investirán preto de 1,5 millóns de euros. A partir de agora, sería necesaria acometer tamén unha terceira fase coa participación de xuíces, fiscais e letrados da Administración de Xustiza.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
