lunes, 20 de abril de 2026
Así o destacou hoxe o conselleiro de Economía, Emprego e Industria, Francisco Conde, na presentación en Santiago desta iniciativa que lidera a Universidade de Santiago, Uninova e a Cámara de Comercio de Santiago.
Conde sinalou que esta aceleradora pon de manifesto que en Galicia hai talento científico e vocación emprendedora lembrando que a Comunidade galega é a terceira con maior número de empresas biotecnolóxicas e se atopa entre as catro cun maior índice de emprendemento neste sector.
O titular de Economía gabou o labor do equipo de Bioga, Clusaga, e do Clúster da Saúde, que representan ao tecido empresarial asociado a este proxecto, e puxo en valor o compromiso da Administración autonómica co emprendemento a través da Rede galega de aceleradoras que hoxe suma BioIncubaTech e a semana pasada engadiu a dirixida á industria aeronáutica, constatando, deste xeito, segundo Conde, o compromiso da Xunta co emprendemento e coa aceleración de novos proxectos de emprendemento en sectores claves da economía.
BioIncubaTech, da que xa manifestaron o seu interese en participar máis de 30 empresas tratoras como Inditex, Coren, Finsa ou Biofabri, enmárcase na Estratexia galega de impulso á biotecnoloxía 2016-2020, que ten entre os seus principais eixos de acción o de fomentar a transferencia de coñecemento ao mercado. A Administración autonómica xa ten executado máis da metade do orzamento desta folla de ruta, 107 millóns de euros que permitiu o apoio de 300 proxectos, a creación de máis dunha decena de empresas e o incremento dos niveis de facturación e de postos de traballo de en torno ao 10%.
A Estratexia ten entre os seus obxectivos, aos que contribuirá a nova incubadora, elevar a facturación do sector un 20% ata os 300 millóns de euros; xerar un 25% máis de empregos asociados; e incrementar un 15% o número de empresas bio.
No eido específico da biotecnoloxía, BioIncubaTech complementa o traballo da primeira incubadora de fármacos en España que desenvolven desde Santiago a Fundación Kaertor e Janssen co apoio da Xunta e o da aceleradora Agrobiotech enfocada ao fortalecemento de empresas da agricultura, a biotecnoloxía ou a biomasa.
O titular de Economía, para rematar, apuntou que a nova incubadora é un exemplo claro de ata onde pode chegar a colaboración público-privada coa que a Xunta busca facer da biotecnoloxía o valor engadido da industria galega e impulsar a súa posición competitiva no panorama internacional.
O FIV de Vilalba volverá reunir na localidade lucense unha programación destacada da escena independente e alternativa estatal, cun cartel no que figuran nomes como Carlos Ares, Alcalá Norte, La M.O.D.A. e Ángel Stanich, xunto a outras propostas moi presentes no panorama actual como Repion, Puño Dragón, Celia Becks, Futuro Alcalde, Grande Osso e Rapariga DJ. A boa resposta do público nas últimas semanas confirma, ademais, a gran acollida desta edición, coa previsión de que Vilalba volva encherse de ambiente festivalero a próxima fin de semana. A programación do FIV de Vilalba desenvolverase entre o Escenario Vibra Mahou, o Escenario #Fiver by Lactalis e a Zona DJ, consolidando un formato que combina os grandes concertos nocturnos coa actividade diúrna do sábado.
Galicia sitúase como a comunidade autónoma con menor porcentaxe de pacientes que agardan máis de 60 días por unha consulta co especialista. Así o referendan os datos publicados polo Ministerio de Sanidade sobre listas de espera no Sistema Nacional de Saúde a peche de 2025. Segundo os datos, en decembro de 2025 a comunidade galega situouse como a cuarta rexión española con mellores tempos medios de espera no ámbito das primeiras consultas. Neste eido, o Servizo Galego de Saúde rexistrou unha media de 63 días de espera, fronte aos 102 do Sistema Nacional de Saúde. Estas cifras reflicten que os galegos esperan 39 días menos para acceder a unha consulta co especialista que a media dos españois.
