sábado, 7 de noviembre de 2026
O presidente da Xunta, Alberto Núñez Feijóo, referiuse a construción das fragatas F-110, que suporán carga de traballo ata 2025, como a oportunidade definitiva para a modernización do estaleiros de Ferrol, e dicir, para a súa competitividade.
Durante a celebración das xornadas Hacia el astillero 4.0 por la transformación digital, organizado por Navantia e a UIMP, Feijóo incidiu na necesidade de que Navantia prosiga co seu plan para converterse nun estaleiro 4.0 e, polo tanto, máis tecnolóxico; e que, por parte do Goberno central se apoie ese esforzo con máis concreción e máis certezas. Non en van, apostar polo estaleiro 4.0, nun prazo de cinco anos, podería traducirse nunha redución dos custos nun 25%, nunha diminución dos prazos dun 25% e nun aumento na calidade tamén do 25%.
É dicir, estamos a falar das mellores garantías para futuros contratos, dixo, facendo fincapé en que a Industria 4.0 supón unha importante vantaxe en termos de produtividade e custos; ou o que é o mesmo, en termos de competitividade.
Diante disto, o titular do Goberno galego resaltou que axudar a todo o tecido produtivo a facer esta transición dixital é un dos principais obxectivos da Xunta. Ao respecto subliñou que a Axenda Galicia Industria 4.0, que recolle as liñas de axuda para iso, cun orzamento total de 352 millóns de euros, xa beneficiou máis de 7100 empresas e permitiu a creación de máis de 18.000 postos de traballo.
Así mesmo, e co obxectivo de anticiparse ao emprego que vén, Feijóo requiriu do compromiso e a implicación tanto do sector público como do privado; sobre todo porque está en xogo a competitividade da nosa industria, pero tamén o noso progreso como sociedade moderna, sentenciou.
Sobre este punto, o responsable do Executivo autonómico lembrou o plan de formación que a Xunta puxo en marcha para empresas e profesionais do naval, dotado con 13 millóns de euros, co obxectivo de mellorar a cualificación de 5000 traballadores en activo e desempregados desta industria; e a mobilización xa de preto de 40 millóns de euros en programas de apoio á innovación neste sector. Ademais de referirse á presentación hai uns meses por parte de Navantia dun dron capaz de inspeccionar tanques de buques sen recibir sinal de GPS; e Navantia Fene está a finalizar a entrega das jackets construídas para un dos parques eólicos mariños máis grandes do mundo que Iberdrola promove na costa británica.
Feijóo aseverou que todo isto conforma uns bos cimentos para levantar sobre eles o estaleiro 4.0 que aspira a ser Navantia, un salto indispensable para consolidar as boas cifras do sector naval en Galicia. Así como no que vai de ano, os estaleiros galegos lograron adxudicarse 9 contratos dun total de 12 en España, polo que acaparan o 40% da carga de traballo en todo o país.
O presidente da Xunta concluíu recordando que Navantia representa na provincia o 16% do PIB industrial e o 24% do emprego industrial.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
