Noticias

A mostra 'Galicia universal. A arte galega nas coleccións de Abanca e Afundación' pecha con máis de 30.000 visitantes

A Cidade da Cultura despide este domingo, 14 de outubro, a mostra máis ambiciosa realizada, ata o momento, sobre as nosas artes plásticas: Galicia Universal. A arte galega nas coleccións de ABANCA e Afundación e cuxo enorme interese levou a máis de 30.000 persoas a achegarse, desde o pasado 16 de marzo, ao Museo Centro Gaiás para admirar unha selecta escolma de 192 obras procedentes das dúas coleccións corporativas de arte máis senlleiras da comunidade e consideradas entre as máis importantes de España.

Por vez primeira, unha mesma exposición reuniu obras de moitos dos artistas galegos máis relevantes dos últimos 150 anos como son Jenaro Pérez Villaamil, Fernando Álvarez de Sotomayor, Urbano Lugrís, Francisco Lloréns, Serafín Avendaño, Laxeiro, Virxilio Vieitez, Manuel Colmeiro, Luís Seoane, Arturo Souto, Maruja Mallo, Eugenio Granell, Julia Minguillón, Francisco Leiro, Antón Patiño, Menchu Lamas, Xaime Quessada, Berta Cáccamo, Antón Lamazares, Pamen Pereira, Elena Colmeiro ou Antía Moure, entre outros moitos ata completar un total de 119.

Ata o 14 de outubro, no Museo Centro Gaiás pode verse esta escolma de pinturas, esculturas, fotografías e instalacións que supuxo unha oportunidade única para achegarse ao proceso de construción da nosa identidade cultural e comprender a dimensión universal da arte galega. Á vez, esta exposición facilitoulle a toda sociedade o acceso ao relevante patrimonio artístico que posúen as importantes coleccións privadas de ABANCA e Afundación.

Programa de actividades

Galicia Universal. A arte galega nas coleccións de ABANCA e Afundación estivo aberta ao público de martes a domingo, con entrada de balde, e contou cun amplo e variado programa de actividades e visitas guiadas e didácticas co fin de contribuír á difusión das obras, cunha especial atención á comunidade escolar, recibindo case 4.000 rapaces e rapazas procedentes de centros escolares. No entanto, a difusión tamén se ampliou aos amantes da arte, co obxectivo de incrementar a afluencia de turismo cultural.

Deste xeito, foi protagonista de moitas das accións do completo programa do Día dos Museos, nos que se fixeron visitas-express e visitas-online ao redor destas obras, e tamén se convidou os e as visitantes durante os dous días de celebración a compartir polas redes sociais cal era a súa obra favorita das 192. Neste programa tamén se organizou a acción ‘Coñece o teu museo por dentro’, que permitiu darlle a coñecer a sociedade como se xestiona e prepara unha exposición de tales dimensións como foi Galicia universal. A arte galega nas coleccións de ABANCA e Afundación, distribuída en dous andares do Museo Centro Gaiás.

De igual forma, a exposición foi protagonista de As Nocturnas, un xeito distendido e ameno de coñecer a arte que acolle a Cidade da Cultura con música e petiscos da Denominación de Orixe Protexida de Queixos Arzúa-Ulloa. Celebradas fóra do horario habitual do Museo Centro Gaiás (ás 21 horas) foron todo un éxito coas entradas esgotadas nas sesións realizadas ao redor da mostra.

Montaxe atractiva

O atractivo desta exposición tamén estivo reforzado polo deseño da montaxe, a cargo do recoñecido estudio galego de arquitectura Abalo e Alonso, que desenvolveu un proxecto para realzar o valor singular das pezas e establecer un diálogo harmónico coa potencia visual do Museo Centro Gaiás.

O catálogo da exposición, en galego, castelán e inglés e editado polo estudio galego Desoños, representou unha obra de referencia para o coñecemento da arte galega, que permanecerá máis alá da clausura da exposición.

A exposición organizou as obras seguindo un criterio temático, no que as pezas se agrupan ao redor de cuestións como a cultura popular, a presenza da muller na arte, o compromiso social, a paisaxe, o retrato, a tradición e a renovación ou os movementos da nova arte galega.

A través deste discurso Galicia Universal. A arte galega nas coleccións de ABANCA e Afundación permitiu comprender como a construción da arte galega é o resultado de dous factores: do compromiso dos artistas coa identidade e por outra banda, da súa vocación de universalidade, reflectida na ligazón coas tendencias e movementos internacionais.

R., 2018-10-11

Actualidad

Foto del resto de noticias (alcoa.jpg) Tanto a Xunta como o Principado de Asturias xa se puxeron en contacto co Ministerio de Industria e co Ministerio para a Transición Ecolóxica para coñecer as propostas que se contemplan neste asunto
Foto de la tercera plana (senfogar.jpg) A Xunta analizará a situación das persoas sen fogar en Galicia co obxectivo de elaborar un plan de atención específico. A cifra de galegas e galegos que sofren carencia material severa reduciuse nun 40% e supón xa menos da metade da media nacional

Notas

Climathon, que naceu en 2015, chegou a Galicia en 2017, e xa reuníu propostas de 16 millóns de persoas de máis de cen cidades, xirará en tres cuestión centrais: onde estamos? Cara onde se quere ir? e Como chegamos alí?
A xornada “As tecnoloxías da lingua”, promovida pola sección de Lingua, Literatura e Comunicación do Consello da Cultura Galega e Política Lingüística, estudiou a situación dunhas ferramentas que facilitan que a comunicación entre persoas estea por riba das barreiras idiomáticas.
PUBLICIDAD
Deputación de Ourense
ACTUALIDAD GALICIADIGITAL
Blog de GaliciaDigital
PROMOCIÓN
PUBLICACIONES
Publicaciones
Publicaciones Amencer
Revista Egap
Obradoiro de Artesania