martes, 11 de agosto de 2026
Así o reflicte a Enquisa Conxuntural a Fogares correspondente ao segundo trimestre e publicada hoxe polo Instituto Galego de Estatística (IGE).
Ademais, no segundo trimestre de 2018 produciuse tamén un incremento da confianza dos consumidores. Así, o indicador de confianza do consumidor tamén mostra unha tendencia positiva ao situarse no -8,17, o que supón unha mellora de 2,7 puntos respecto ao trimestre anterior.
Esta mellora é consecuencia das mellores perspectivas que teñen os fogares galegos sobre a situación financeira persoal -que mellora 5,2 puntos sobre o trimestre anterior-, sobre a situación económica de Galicia que mellora 4,1 puntos- ou sobre a evolución do desemprego nos vindeiros meses, que mellora case 3 puntos. A única compoñente que non mellora é a da capacidade futura de aforro, que empeora 1,5 puntos.
Medidas
Ademais, a enquisa do IGE mostra tamén unha redución dos fogares que no segundo trimestre tomaron medidas para reducir gastos ou aumentar ingresos. Por exemplo, o instituto estatístico ratifica que baixan os fogares que cambian os seus hábitos de compra para aforrar, que diminúen outros gastos comúns como roupa, calzado ou transporte- e que reciben axuda económica de familiares ou amizades.
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
