viernes, 22 de agosto de 2025
Nota de prensa del Gabinete de Comunicación del PSdeG:
O secretario xeral do PSdeG, Gonzalo Caballero, participou na inauguración das xornadas Perspectivas financeiras no período comunitario 2021-2027. Retos e oportunidades para España e Galicia, onde chamou a atención sobre o moito que está en xogo na programación plurianual de fondos da UE. Así é que esixiu a Feijóo que sitúe como prioridade as necesidades de Galicia e plantexe nas institucións europeas unha axenda que incorpore os nosos intereses á mesa de negociación. Ten que entender, proseguiu Gonzalo Caballero, que os orzamentos comunitarios afectan de forma moi relevante a rexións como Galicia, que sofre un importante devalo demográfico e ten importantes diferencias de renda.
Instamos a Feijóo a que, máis alá da súa axenda de promoción dentro do PP, atenda os problemas do país, reclamou o líder dos socialistas galegos, co convencemento de que o novo reparto dos orzamentos vai ser fundamental para a Galicia da próxima década. Necesitamos fondos para converxer coas rexións máis avanzadas, recalcou, para lamentar que a Xunta teña esquecido facer xestións nesta liña.
De feito, reprobou que o goberno galego só estea centrado na xestión dos recortes e en presentar a Feijóo coma un bo xestor pese a ter disparado a débeda pública, e a que carece tanto de proxecto para Galicia como de estratexia para mellorar o reparto da PAC ou as inversións comunitarias nesta comunidade.
A modo de exemplo, Gonzalo Caballero aludiu a exclusión de Galicia do corredor atlántico de mercadorías ou ao feito de que se descubriu que, pese aos anuncios de Feijóo, a Xunta nin presentou candidatura para obter a sede do laboratorio europeo de bivalvos.
Fronte a isto, o secretario xeral do PSdeG defendeu a necesidade de marcar unha folla de ruta distinta e dar peso a Galicia tanto na política española coma na europea. Os socialistas, asegurou, levarán ás distintas institucións esa perspectiva que a Xunta non está asumindo.
E se Gonzalo Caballero sinalou que xunto a cuestións como o reparto dos fondos da PAC, hai que incorporar á negociación en Europa novas prioridades como a loita contra o devalo demográfico, o eurodeputado socialista José Blanco puxo tamén o foco en desafíos como o cambio climático.
A Fundación Artesanía de Galicia organiza por quinto ano consecutivo o encontro Artesanía de Galicia na Ribeira Sacra co obxectivo de divulgar os oficios tradicionais, impulsar a comercialización do produto artesán galego e consolidar a marca Artesanía de Galicia. O evento celebrarase o vindeiro sábado 23 de agosto no Santuario de Nosa Señora de Cadeiras, no concello de Sober, en horario de 11.00 a 21.00 horas. A edición deste ano conta coa participación de 19 obradoiros da marca Artesanía de Galicia especializados en oficios como a olería tradicional, a xoiería, a cerámica, os xoguetes, a bixutería, o manipulado de papel ou os complementos de moda. Os obradoiros da Ribeira Sacra que asisten como expositores son a Alfarería Elías de Gundivós (Sober), Enxógate (Quiroga) e Mimacuir (Castelo, Taboada). Os demais proceden do resto de Galicia.
As dúas obras vencedoras na última convocatoria do Premio Barriga Verde de textos para teatro de monicreques, nas súas modalidades para público infantil e adulto, acaban de ver a luz na colección que a Xunta de Galicia mantén con Baía Edicións para incorporar ao sistema literario galego os textos recoñecidos con este galardón da Consellería de Cultura, Lingua e Xuventude. Manchea, co que Andrea Freire se alzou co devandito premio na categoría de monicreques para a rapazada, e O Faro, polo que Carlos Labraña gañou na modalidade para adultos, están xa dispoñibles tanto na Libraría Institucional da Xunta como en puntos físicos de venda.
