miércoles, 12 de agosto de 2026
Nota de prensa del Foro Económico de Galicia:
O Foro Económico de Galicia vén de presentar un novo documento titulado Turismo rural: Diagnose e propostas do que son coordinadores os profesores da Universidade de Vigo, Miguel Rodríguez e Elisa Alén. O punto de partida do traballo é dar resposta á pregunta de se o turismo rural en Galicia está a favorecer o crecemento socioeconómico do rural galego. Con esta finalidade, faise inicialmente unha diagnose da situación actual para a logo facer distintas propostas de actuación.
A situación actual do turismo rural en Galicia caracterízase por unha baixa ocupación media, pouca rendibilidade económica (baseada fundamentalmente na complementariedade de rendas e no traballo familiar) e falta de produción de produtos turísticos rurais integrados que combatan adecuadamente a estacionalidade, fixen poboación e dinamicen as economías rurais.
É preciso poñer en marcha propostas de actuación centradas fundamentalmente en ofertar un produto integral e diferenciado. Neste senso, precisamos darlle un pulo ao receptivo como elemento desestacionalizador desenvolvendo experiencias turísticas centradas na valorización dos nosos recursos diferenciadores.
En definitiva, é necesaria unha reordenación do turismo rural que inclúa unha especialización territorial e outra temática, pero sempre en consonancia coa propia base produtiva de cada comarca. A existencia dos xeodestinos, baseados nunha especialización de tipo comarcal, é unha oportunidade para esa segmentación territorial. Esta especialización precisa dunha oferta complementaria ao propio aloxamento, mediante a creación de ofertas de turismo activo, tanto polos titulares dos establecemento turísticos como por outras empresas locais, xerando oportunidades de novos empregos e actividades económicas. Para tal fin, deberíase poñer en valor aqueles negocios que traballan de maneira máis profesionalizada.
Fotografía: Foro Económico de Galicia
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
