sábado, 7 de noviembre de 2026
Nota de prensa del Gabinete de Comunicación del PPdeG:
Feijóo lembrou que entre os valores fundacionais da Unión ocupa un lugar moi especial a defensa da estabilidade, recoñecendo que xamais podemos dar por feito o obxectivo de manter unha Europa estable, responsable e democrática. Así mesmo, apuntou que a recesión económica rachou a confianza dos europeos nas súas institucións e que sería irreal afirmar que saímos indemnes pero, grazas á unidade e á responsabilidade de todos, conseguimos amortecer as consecuencias destas acometidas.
Nese senso, lamentou que un dos golpes ao proceso de construción europea proveu dalgúns dirixentes de Cataluña, indicando que non é casualidade que, cando Carles Puigdemont comprobou que ningún país europeo daba cobertura ao seu desafío separatista, orientase as súas críticas cara á UE. O expresidente catalán é plenamente consciente de que, nunha Europa forte, xamais poderá ter éxito no seu intento de dividir a sociedade catalá e debilitar a democracia española, subliñou.
Feijóo tamén fixo fincapé en que as rexións están a traballar para lograr unha Europa máis unida e forte para o que é preciso seguir apostando pola cohesión entre territorios, engadindo que, agora que se fan escoitar propostas populistas, nacionalistas e radicais, debemos defender con máis forza que nunca a vixencia de Europa como proposta e como resposta.
Deste xeito, admitiu que unidos poderase seguir optando ao liderado mundial en materia de innovación, continuar apostando por unha agricultura e gandaría modernas, eficientes e sustentables; e consolidarnos como potencia pesqueira, superando así os desafíos que entraña o Brexit.
Así, e malia que son moitos os que desexan que a Unión Europea se debilite, Feijóo apostou por seguir defendendo sen complexos unha Europa estable, próspera e integradora; continuar traballando por unha Europa orientada a reducir as desigualdades entre os seus membros; e proseguir reivindicando que a historia da Unión Europea é ante todo unha historia de éxito.
Durante o seu discurso, Feijóo tamén fixo referencia á importancia da innovación, destacando o obxectivo de lograr en 2020 un investimento en I+D+i do 3% do PIB, algo para o que Galicia está a facer importantes esforzos ata o punto de que convertemos a innovación nunha prioridade rexional.Sobre isto, o presidente tamén puxo en valor que duplicamos o volume de fondos conseguidos neste primeiros catro anos de Horizon 2020, os proxectos dos investigadores galegos conseguiron atraer fondos europeos por un valor de 66,4 millóns de euros desde 2014 e aumentouse a cota de proxectos con participación galega que lideran os nosos científicos.
A innovación tamén se converteu no motor fundamental de moitos ámbitos da nosa economía e a sociedade e, nese sentido, Feijóo lembrou que en sanidade impulsáronse avances como a receita ou a historia clínica electrónica, ademais de técnicas de hospitalización experimental e a domicilio en hospitais galegos; en enerxía, estase a impulsar en Ourense un ecobarrio pioneiro e acabaranse de aprobar unhas novas Directrices Enerxéticas que nos permitirán seguir consolidando unha economía máis sustentable; na industria, estamos a apoiar a implantación da fábrica intelixente e mobilizamos preto de 1.000 millóns no marco da Estratexia de especialización intelixente RIS3; e en contratación pública, Galicia é líder a nivel español en Compra Pública Innovadora.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
