sábado, 7 de noviembre de 2026
Nota de prensa del Gabinete de Comunicación del PPdeG:
O Grupo Popular vén de rexistrar unha proposta de resolución ao informe de fiscalización do Consello de Contas sobre as contabilidades electorais das ultimas eleccións autonómicas a través da que se insta á Xunta a adaptar o réxime xurídico vixente en materia de financiamento das formacións políticas para regular o emprego das novas formas de financiamento como o crowdfunding e os microcréditos ou micropréstamos.
O portavoz do Grupo Popular, Pedro Puy, explicou que o conselleiro maior do Consello de Contas manifestou na súa comparecencia da semana pasada no Parlamento para dar conta do informe de fiscalización das contas electorais que todas as forzas políticas con representación parlamentaria cumpriron caos súas obrigas de transparencia, polo que teñen dereito a recibir as subvencións que a norma prevé unha vez xustificados os gastos nos que se incorreron na campaña electoral.
Porén, no propio informe se establecen algunhas cuestións que entendemos que aconsellan reformar, como que a Xunta regule máis polo miúdo na Lei que regula o financiamento electoral o réxime xurídico vixente en materia de financiamento das formacións políticas, en relación concretamente coas novas formas de financiamento como o crowdfunding e os microcréditos ou micropréstamos, manifestou o portavoz popular.
Neste sentido, Puy indicou que estas novas formas de financiamento non están contempladas na normativa aplicable, polo que poden introducir algún tipo de dificultade na fiscalización do cumprimento da lei do financiamento das campañas electorais.
Así mesmo, entre as propostas de resolución do Grupo Popular inclúese que o Consello de Contas se interese ante o Tribunal de Cuentas para que remate os traballos de adaptación do Plan de Contabilidade das formacións políticas ás prescricións recollidas na Lei orgánica de control da actividade económico-financeira dos partidos políticos.
Trátase dunha adaptación que corresponde ao Tribunal de Cuentas e que non ten feito, polo que consideramos necesario que o propio Consello de Contas se dirixa ao citado tribunal para que acelere a aprobación deste novo plan contable de aplicación efectiva a todas as formacións políticas, indicou Puy.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
