jueves, 13 de agosto de 2026
Nota de prensa del Gabinete de Comunicación de CC.OO. Galicia:
As delegadas e delegados que participaron no 11.º Congreso Nacional de CCOO elixiron a Ramón Sarmiento Solla como secretario xeral para os próximos catro anos. A súa candidatura foi apoiada co 82,55 % dos votos emitidos; así mesmo, a súa proposta de Comisión Executiva Nacional foi referendada polo 80 % dos votos. O novo dirixente substitúe no cargo a Xosé Manuel Sánchez Aguión, que non se presentaba á reelección, e faino prometendo renovar o traballo sindical e loitar a prol da unidade de acción con outras organizacións sindicais.
Canda Ramón Sarmiento formarán parte da nova Comisión Executiva Nacional tres membros da dirección saínte, que son Maica Bouza Seoane, Mabel Pérez Simal e Xesús Castro Baamonde. A estes nomes súmanse cinco que proceden directamente das súas seccións sindicais: M.ª del Carmen Peteiro García (Banco Pastor-Popular), Omar Ceveira Vázquez (Zara Logística), Roi Fernández Rodríguez (FINSA), Yolanda Martínez Quintián (Bankia) e Carmen Adela Sabio Sanz (Concello de Vedra).
O xa ex-secretario xeral, Sánchez Aguión, desexoulle «sorte» ao seu sucesor e salientou que se conseguise chegar e sair deste Congreso cunha candidatura de unidade tanto á Secretaría Xeral como á Comisión Executiva Nacional.
Clausura do Congreso
Na clausura do Congreso, o conselleiro de Economía, Francisco Conde, salientou o «talante, pero tamén firmeza nas ideas» de Sánchez Aguión e tendeu unha man para o entendemento con Ramón Sarmiento. Pola súa parte, o secretario xeral confederal agradeceu a «xenerosidade» de Aguión non presentándose á reelección e favorecendo así a remuda xeneracional na organización. Ignacio Fernández Toxo, quen tampouco concorrerá como candidato en xuño ao 11.º Congreso Confederal, chamou tamén a defender o emprego e os mecanismos de protección social, con especial atención ao sistema de pensións.
Pola súa parte, o novo dirixente sindical prometeu moito traballo, especialmente para dar resposta á falta de expectativas da mocidade deste país. Tivo tamén palabras para a patronal e o Goberno galegos, aos cales advertiu de que terán en CCOO un «discrepante pero leal» interlocutor. Rematou con palabras de agradecemento para o seu predecesor, Xosé Manuel Sánchez Aguión, e polo secretario xeral confederal, Ignacio Fernández Toxo, por facilitaren os procesos de renovación do sindicato.
A resolución xeral deste 11.º Congreso salienta que a recuperación económica non se está a trasladar á realidade do emprego e das persoas. O emprego que se crea é «pouco e precario» e increméntanse as desigualdades e a precariedade. Se no anterior Congreso xaneiro de 2013 a economía estaba en recesión, catro anos despois «saímos da recesión, pero non da crise».
A maioría social «foi a gran prexudicada» pola crise e polas políticas aplicadas, promovidas polas institucións europeas «e aplicadas en España co máximo rigor polo Partido Popular», censura CCOO. O sindicato critica tamén que o PP de Galicia non adoptase ningunha política para contribuír á revitalización da actividade económica nin para apoiar os sectores produtivos básicos: «nestes anos agudizouse a crise do sector lácteo e do pesqueiro; tamén nas actividades industriais como o sector naval ou as ligadas ao uso intensivo de enerxía», recolle a resolución.
O Goberno galego fixo da redución do déficit o centro da súa acción, «pero esqueceuse de facer política de país e de poñer os galegos e as galegas no centro das súas actuacións». Neste contexto, «a prioridade deben ser as persoas», insiste o sindicato.
A reactivación económica depende de que haxa máis ingresos para facer outras políticas, e isto require un novo modelo fiscal para o que Galicia ten competencias plenas, investimento público e recursos financeiros para as empresas pero, sobre todo, require dun novo modelo produtivo. CCOO aposta pola evolución cara a unha economía sostible e socialmente avanzada, seguindo indicadores de desenvolvemento económico, igualdade, cobertura social ou innovación, a través dun incremento do valor engadido das empresas que se traduza nunha distribución máis equitativa da riqueza xerada, o que esixe avanzar na estabilidade e a cualificación no emprego.
Para iso, avoga por reforzar os sectores básicos da economía galega, recuperar a negociación colectiva como instrumento de intervención sindical e desmontar a pretensión patronal de desvincular as pequenas empresas da negociación colectiva do seu ámbito, entre outras actuacións. Nos próximos catro anos, CCOO quere ser «máis sindicato nas empresas e na sociedade» e pretende facelo «artellando un plan de traballo que sexa avaliable periodicamente e redefinible cando for necesario».
Aprobáronse tamén resolucións a favor da industria galega, en defensa dos postos de traballo en Ence e Elonsa, contra a violencia machista, contra a LGTBIfobia e a prol da conciliación da vida familiar e laboral.
Fotografía: Gabinete de Comunicación de CC.OO. Galicia
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
