jueves, 13 de agosto de 2026
Nota de prensa del Gabinete de Comunicación de la Xunta de Galicia:
O conselleiro de Economía, Emprego e Industria, Francisco Conde, trasladoulles aos representantes dos traballadores de Ferroatlántica en Cee e Dumbría que a Xunta seguirá garantindo o cumprimento estrito da lei, e polo tanto, que a prioridade do Goberno galego será cumprir en todo momento as condicións que fixa a lexislación e salvagardar o interese público da concesión.
No encontro co comité de empresa, Conde apuntou que nestes momentos os servizos técnicos e xurídicos da Administración autonómica están avaliando polo miúdo a documentación presentada pola compañía, sinalando que se tramitará con rigor e seriedade, como marca o procedemento administrativo.
Tal e como sinalou o conselleiro, o Goberno comprende perfectamente a inquietude dos traballadores pero entende que a forma de dar resposta e de dar confianza aos propios traballadores é non precipitarse, estudar a documentación e ser garantista e transparente en todo o procedemento.
O responsable de Economía, Emprego e Industria engadiu que se está a tramitar a petición feita polo comité para que poida ter acceso á solicitude presentada pola empresa. Do mesmo xeito, indicou que a decisión que finalmente se adopte será en base a argumentos técnicos e xurídicos, seguindo ao pé da letra o que marca a lexislación.
Conde fixo especial fincapé no compromiso que está a amosar a Xunta desde o primeiro momento para, a través da máxima transparencia e o diálogo permanente cos alcaldes da comarca e cos traballadores, traballar a prol do mantemento desta actividade industrial.
Fotografía: Gabinete de Comunicación de la Xunta de Galicia
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
