jueves, 7 de mayo de 2026
Da árbore á cadeira propón unha viaxe emocional da materia ao produto, da madeira ao mobiliario doméstico. Comisariada polo arquitecto Carlos Seone, a mostra dirixirá a ollada dos visitantes cara á riqueza ambiental dos bosques, a tradición en Galicia dos oficios vinculados ás artes da madeira e ao deseño contemporáneo do moble.
Este percorrido comeza nos propios bosques galegos, baixo a ollada de fotógrafos como Manuel Vilariño, Vari Caramés, Xosé Caruncho, Juan de la Sota ou Juan Rodríguez; grandes artistas plásticos como Castelao, Seoane, Maside e figuras contemporáneas como Pamen Pereira ou Jorge Perianes. Nunha segunda etapa deste percorrido, a exposición ofrece unha viaxe polo deseño desde os pioneiros (Isaac Díaz Pardo, Alejandro e Jesús de la Sota e Xosé Bar Bóo) ate os contemporáneos, entre os que se atopan moitos dos grandes arquitectos e deseñadores galegos, como Manuel Gallego Jorreto, Irisarri e Piñera, Noguerol e Díaz, Iago Seara, Carlos Quintás, Creus e Carrasco, Tomás Alonso, Elías Cueto, Lucía Buceta ou Iñaki Leite.
O presidente do Goberno galego, Alberto Núñez Feijóo, destacou a exposición Da árbore á cadeira como unha homenaxe á tradición da madeira en Galicia, que serve para recoñecer as implicacións dunha actividade que fala do que temos e do que somos. Durante unha visita á mostra, Feijóo afirmou que esta exposición reflicte que a madeira forma parte indispensable da nosa vida diaria, a través dos mobles; e que transcende ao valor de utilidade, pois tamén serve á creatividade, a través das obras de arte.
Así mesmo, incidiu en que o corazón forestal de Galicia significa: unha oportunidade, porque o seu valor económico repercute positivamente na economía do rural, sendo o mellor xeito de diversificalo e asegurar o seu futuro; competitividade, porque dá emprego a 70.000 persoas; e identidade, porque a masa forestal e todo o que implica é patrimonio e froito da responsabilidade de todos os galegos.
Nesta mesma liña resaltou que os emprendedores do moble e a madeira de Galicia facturaron máis de 1900 millóns de euros; e as 3000 empresas que conforman o sector, das que un 37% pertencen á primeira transformación e un 63% á segunda, exportan máis de 800 millóns de euros. O titular da Xunta concluíu apostando por seguir aproveitando a madeira como recurso natural propio, e por facelo de maneira sustentable.
Comisariada polo recoñecido arquitecto galego Carlos Seoane, Da árbore á cadeira propón unha viaxe emocional da materia ao produto, da madeira ao mobiliario doméstico. Así, a exposición ofrece unha viaxe polo deseño desde os pioneiros (Isaac Díaz Pardo, Alejandro e Jesús de la Sota e Xosé Bar Bóo) ata os contemporáneos, entre os que se atopan moitos dos grandes arquitectos e deseñadores galegos, como Manuel Gallego Jorreto, Irisarri e Piñera, Noguerol e Díaz, Iago Seara, Carlos Quintás, Creus e Carrasco, Tomás Alonso, Elías Cueto, Lucía Buceta ou Iñaki Leite.
Previamente, o visitante entrará en diálogo cos bosques a través da súa compoñente artística, cultural e identitaria. A ollada persoal de fotógrafos como Manuel Vilariño, Vari Caramés, José Caruncho, Juan de la Sota ou Juan Rodríguez mestúranse no primeiro andar do Museo Centro Gaiás coa visión que do bosque tiveron grandes artistas plásticos como Castelao, Seoane, Maside e figuras contemporáneas como Pamen Pereira ou Jorge Perianes. Unha vinculación home-territorio que tamén se plasma a través das árbores centenarias da finca Galega de Alfoz ou a colección de troncos de Xaquín Lorenzo, Xocas.
Da árbore á cadeira conta coa colaboración do Grupo Cándido Hermida, que fabricou en exclusiva para a mostra mobles deseñados polo comisario Carlos Seoane, Fundación Banco Sabadell e Viaqua, ademais do apoio do Clúster da Madeira e o Deseño en Galicia. E como todas as actividades culturais da Cidade da Cultura, a exposición conta co patrocinio do Fondo Gaiás da Empresa Galega.
A exposición pode visitarse desde o 7 de abril ata o 5 de novembro de martes a domingo en horario de 10 a 20 horas. Ademais, a Cidade da Cultura ofrece todos os días visitas comentadas á mostra ás 17:30 horas e os sábados, domingos e festivos tamén ás 12:30 horas. A entrada á nova mostra da Cidade da Cultura é de balde.
O Festival de Cans celebrará entre o 19 e o 23 de maio a súa 23ª edición tras recibir 235 obras inscritas, o segundo mellor rexistro da súa historia, e recuperar a súa condición de certame puntuable para os Premios Goya. A competición oficial reunirá 13 curtametraxes nas seccións de Ficción e Animación, con ata 10 estreas e sete cineastas debutantes, xunto a once propostas na categoría Furacáns, dedicada á non ficción. As obras seleccionadas abordan temáticas como o medio ambiente, a saúde mental, a violencia de xénero, a memoria, o despoboamento, a identidade ou o universo LGTBI+, con linguaxes que van do drama social á animación, o terror, a comedia negra ou as narrativas híbridas. As liñas descontinuas, de Anxos Fazáns, na inauguración, e 360 curvas, de Alejandro Gándara e Adriana Silva, na sección de documentais, son algunhas das proxeccións galegas máis sinaladas.
Galicia terá este ano un total de 118 praias en 38 municipios galardoadas coa bandeira azul, un distintivo de carácter internacional co que a Asociación de educación ambiental e do consumidor (Adeac) recoñece anualmente a areais de todo o mundo seleccionados en base a unha serie de rigorosos criterios de sustentabilidade, accesibilidade e servizos. Desde xeito e con 10 distintivos máis que o ano anterior, Galicia concentra case unha de cada sete bandeiras concedidas en España (794) e consolida a súa posición entre as tres comunidades que reciben un maior número de distintivos para as súas praias, xunto con Valencia (que suma 197) e Andalucía (184).
