sábado, 7 de noviembre de 2026
Nota de prensa del Gabinete de Comunicación del PPdeG:
O secretario xeral do PPdeG, Miguel Tellado, afirmou que nos próximos meses a encomenda dos populares galegos é traballar nos congresos locais. Así mesmo, avanzou que os máis inmediatos serán os de A Coruña e Lugo, que posiblemente se celebren xa esta mesma primavera, e aos que seguirán os doutras cidades e un bo número de vilas de tamaño intermedio.
Con isto, Tellado manifestou que teñen tres obxectivos moi claros: actualizar os equipos que traballan no día a día das nosas cidades; facer emerxer novos liderados, con persoas que teñan a lexitimidade para poñerse á fronte dun novo proxecto; e construír unha alternativa sólida do xeito máis rápido posible nos lugares nos que debemos recuperar o terreo perdido.
Este partido non para, nin a nivel estatal, nin a nivel autonómico, nin a nivel local; e non o faremos mentres poidamos dar resposta ás necesidades dos galegos, apuntou Tellado.
Igualmente, o secretario xeral do PPdeG subliñou que en 2017 poñerase en moitos lugares de Galicia a primeira pedra de proxectos para conseguir devolverlle ás nosas cidades e vilas os gobernos que merecen. Con ese espírito afrontamos os nosos procesos internos, como o inicio de etapas ilusionantes en moitos puntos da nosa comunidade, engadiu.
Durante a súa intervención en rolda de prensa, Tellado tamén se referiu ao Congreso nacional do PP, ao que os populares galegos fomos a Madrid a debater formas de traballar polas persoas ás que nos debemos os representantes públicos.
Nese senso, sinalou que é un feito que o PP galego fundamenta os seus bos resultados electorais no contacto coa xente, en pisar a rúa e adaptarse ás demandas dos cidadáns. Deste modo, recoñeceu que traballan día a día coa premisa de que deben ser unha organización viva e en cambio constante.
Tellado insistiu en que, por este motivo, desde o Partido Popular de Galicia preparámonos para que neste 2017 poidamos afondar nunha constante renovación que foi peza importante dos nosos éxitos recentes.
Para rematar, o número dous do PPdeG lembrou que a pasada fin de semana puidéronse contrastar dous proxectos nacionais de partido ben distintos. Por un lado Podemos, centrado nas súas loitas e purgas internas, que apostou pola vía máis radical, agresiva e antisistema; e polo outro o PP, centrado en traballar pola xente desde as institucións, que continúa co seu rumbo moderado e integrador.
Ese mesmo contraste vémolo día a día en Galicia, destacou Tellado indicando que mentres as Mareas de Podemos se preocupan por conspirar contra Villares, por non deixar falar a Carmen Santos en público ou por tapar a parálise das cidades con palabras bonitas; os populares preocúpanse por gobernar e por consolidar o crecemento do país.
Se o obxectivo de Podemos ao contraprogramar o Congreso era que os españois nos comparasen, cremos que non debe haber ningunha dúbida sobre cal deles é un proxecto político serio e cal unha mala copia do exército zapatista, sentenciou.
Fotografía: Gabinete de Comunicación del PPdeG
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
