jueves, 15 de mayo de 2025
Nota da CRTVG (http://www.crtvg.es/informativos/o-desconecido-triunfadora-na-noite-dos-mestre-mateo-con-12-galardons):
A película "O Descoñecido" foi a gran triunfadora dos Premios Mestre Mateo con doce galardóns, case a metade dos vinte e cinco que se repartiron, entre os que recibiu o recoñecemento á mellor longametraxe, á mellor dirección e aos mellores actor e actriz.
"O Descoñecido", de Vaca Films e Atresmedia Cinema, coa participación da TVG, recibiu o premio á mellor película e mellor dirección de Dani de la Torre, quen lle solicitou aos políticos que "se sentan orgullosos" do audiovisual galego e o empreguen "como bandeira, non como barreira" e engadiu que estará "máis contento" cando haxa "catro mulleres directoras finalistas".
De la Torre, ademais de dedicarlle o premio ao seu equipo e á súa familia, ofreceullo aos seus compañeiros directores entre os que "non hai ningún mellor ou peor", xa que isto "non é unha competición, senón que cada un ten o seu estilo", dixo.
A mellor interpretación protagonista masculina foi a de Luís Tosar, quen puxo a nota de humor ao ter que dar o discurso a través dunha chamada, ao non poder estar na gala, e a feminina para a nova actriz Paula do Río, que realizou o papel da filla de Tosar na longametraxe.
Ao mesmo filme tamén foron a parar a mellor interpretación de reparto feminina e masculina, para Elvira Mínguez e Javier Gutiérrez, premiado nos Goya en 2015 na mesma categoría e que o dedicou a "todos os avós xubilados que pelexan contra un sistema que é unha estafa", en relación á temática do filme.
Ademais das mencionadas, a exitosa película de Dani de la Torre, que se alzou con dous Goya este ano, repetiu os éxitos dos premios nacionais nas mesmas categorías dos Mestre Mateo: montaxe (Jorge Coira) e son (David Machado, Nacho Areas e Jaime Fernández).
Por último, "O Descoñecido" completou a súa particular festa no Pazo da Ópera da Coruña co mellor guión (AlbertoMarini), a mellor dirección de produción (Carla Pérez de Albeniz), a mellor música orixinal (Manuel Riveiro) e a mellor dirección de fotografía (Josu Incháustegui).
Un total de 146 obras que se estrearon en 2015, ademais de 159 produtoras e 518 profesionais do sector do cinema e a Televisión en Galicia, optaron a estes galardóns, que se celebraron baixo as notas das cancións máis representativas do programa infantil Xabarín Club.
Un dos homes do tempo de TVE, o lucense Martín Barreiro, foi recoñecido como mellor comunicador e do mesmo xeito que na última edición, "Serramoura", de Voz Audiovisual e TVG, foi gratificada como mellor serie de televisión, e ZigZag Diario, de TVG, como mellor programa de televisión, sumando xa cinco consecutivos.
Mentres, a mellor realización foi a de José Villaverde, polo programa de entretemento Land Rober Tunai Show; a mellor maquillaxe e perruquería, Óscar Aramburu e Sabela Martín, pola serie "Hospital Real", de Ficción Producións e TVG, e mellor vestiario, Marta Anta, por "Lobos Sucios".
"Lobos Sucios", de Agalla Films, Dream Team Concept e Left Field Ventures, acumulou o seu segundo e último galardón dos catorce aos que estaba nomeado co de mellor dirección de arte, de Antonio Pereira.
O mellor videoclip foi o executado por Miss Movies para o grupo Herdeiros da Crus; o mellor documental, "Os días afogados", de Amanita Films, e a mellor serie web, "O Método Sueco", de PorcoBravú.
"Eco", de Xacio Rodríguez Baño, logrou ser a mellor curtametraxe, mentres a mellor curtametraxe animada foi "O Terceiro Porco", dos alumnos do IES Imaxe e Son da Coruña, e mellor anuncio publicitario, "Imposible sen ti", de Tex45Producións, en colaboración con Ainé Producións.
O presidente da Academia Galega do Audiovisual, o guionista Carlos Ares, reivindicou o deber do audiovisual galego de "deixar de plantar o xerme do machismo" e "non fomentar a desigualdade".
O premio de honra "Fernando Rey" recaeu, como xa estaba anunciado, en Xavier Villaverde, un dos expoñentes do audiovisual galego contemporáneo, e o premio especial "José Sellier" levoullo o colectivo Númax, grazas a que o xurado a destacou como unha iniciativa arriscada e innovadora.
A gala foi presentada por Marga Pazos, da Televisión de Galiciae galardoada na pasada edición, e polo humorista e actor Xosé Antonio Touriñán.
A edición deste ano estivo marcada por un erro notarial no reconto de votos para a elección dos finalistas que alterou os resultados e afectou a 14 finalistas en trece candidaturas representadas nestes galardóns, cuestión coa que chancearon esta noite os presentadores.
A cidade da Coruña acolle do 16 ao 24 de maio o Galicia Design Week, festival dedicado ao deseño e de referencia neste ámbito para todo o noroeste peninsular, que desenvolve a súa sexta edición para promover e difundir a creación galega e internacional do sector. O encontro, codirixido por Marta González Rivas e Álex Rico Caramés, e que forma parte da prestixiosa organización World Design Weeks, ofrece unha ampla programación con acceso gratuíto a un total de 21 actividades. Coloquios, exposicións, sesións musicais e gastronomía conforman unha proposta na que o obxectivo é poñer en valor un eido creativo de gran potencial e transversalidade, entre a creación cultural e a produción industrial.
As 105.378 doazóns de sangue do ano pasado supoñen 1.853 máis que no 2023, representando un incremento de preto dun 2 %. O incremento producido nas doazóns de sangue permite elevar un punto máis a taxa global galega, pasando de 38 a 39 doazóns por cada 1.000 habitantes e ano, situando á nosa comunidade entre as que contan cun nivel máis alto de participación en todo o Estado, manténdose ao redor dos tres puntos por riba da media nacional. Outro dato moi positivo é o feito de que o pasado ano 8.931 persoas doaron sangue por primeira vez.
