miércoles, 12 de agosto de 2026
Nota de prensa remitida por el Gabinete de Comunicación de la Xunta de Galicia:
O lehendakari Iñigo Urkullu mantivo, no Palacio de Ajuria Enea, un encontro co presidente da Xunta de Galicia, Alberto Núñez Feijóo, no que avaliaron, entre outros temas, a situación económica e novas vías de colaboración entre Galicia e Euskadi.
Os líderes dos executivos vasco e galego coincidiron en sinalar que a prioridade de ambos os gobernos é o desenvolvemento económico e a creación de emprego. E, neste senso, comentaron a posibilidade de colaborar en ámbitos como a industria marítima, a alimentaria, a pesca, o turismo ou a innovación sanitaria.
Urkullu e Feijóo coincidiron en que o sector da industria marítima de Euskadi e Galicia continúa en fase ascendente, recuperándose dos niveis de actividade previos ao conflito do tax lease. O sector naval é un ámbito importante e é por iso que mostraron a súa preocupación pola crise do aceiro. O lehendakari e o presidente de Galicia avogan por unha coordinación de ambos os gobernos nesta materia para facer fronte ao dumping chinés.
O modelo económico que propoñen os executivos presididos por Feijóo e Urkullu prioriza esta e outras actividades industriais como eixes dun crecemento sostido, que debe ter na Administración un axente facilitador. Neste sentido, a aposta pola innovación e a Industria 4.0, que estes territorios veñen desenvolvendo desde hai tempo, constitúe un punto de colaboración con grandes posibilidades cara ao futuro.
A industria alimentaria é tamén outro dos puntos fortes en común entre ambas as comunidades, xa que se trata dun sector competitivo. Existe unha colaboración no sector lácteo e tanto o lehendakari como o presidente da Xunta destacaron a necesidade de analizar novas vías de colaboración.
Así mesmo, ambas as comunidades comparten unha vocación pesqueira que vén de lonxe e que se materializa na existencia duns intereses comúns. A defensa dun reparto de cotas positivo para todos, que aproveite os recursos naturais para xerar o maior emprego e riqueza posibles, é para ambos os territorios unha cuestión prioritaria, que de ningún modo está rifada co compromiso por facer desta unha actividade sustentable e respectuosa co medio.
O turismo de Euskadi e Galicia ten varias similitudes e xa veñen colaborando na promoción e posicionamento do Camiño de Santiago, que se viu reforzada coa recente distinción do Camiño do Norte como Patrimonio da Humanidade. Ademais, as comunidades vasca e galega teñen unhas características paisaxísticas similares.
Durante a xuntanza abordaron tamén a protección do medio ambiente. E, ambos presidentes consideraron oportuno traballar conxuntamente na loita contra o cambio climático a través do arco atlántico.
No referido ás políticas sociais, os dous mandatarios coincidiron na importancia duns servizos públicos de calidade, que ambas as comunidades se esforzaron en manter durante a época de crise, e exploraron novas vías de colaboración para seguir mellorándoos cara ao futuro. Neste senso, cómpre lembrar que o próximo mércores se asinará un convenio de colaboración entre os respectivos servizos de saúde para unir esforzos en materia de innovación sanitaria.
Así mesmo, e en relación á demografía expuxeron as súas respectivas medidas neste eido. Por un lado, a Estratexia de política de familia e infancia, proposto como pacto de país en Euskadi e, polo outro, o Plan de dinamización demográfica de Galicia presentado no Parlamento galego, así como o Programa de apoio á natalidade.
No tocante á situación política do Estado español, ambos compartiron a necesidade dunha estabilidade institucional baseada nos acordos políticos entre os partidos.
O lehendakari Urkullu e o presidente Feijóo, constataron a boa relación que manteñen Euskadi e Galicia, pobos cunha cultura e unha lingua propias e con raíces profundas. Coñeceron tanto a emigración como a inmigración, e Euskadi tamén foi terra de acollida para unha comunidade galega asentada desde hai anos. Esta comunidade é parte do presente e do futuro de Euskadi e os presidentes acordaron traballar cóbado con cóbado por mellorar e progresar nas súas relacións.
Fotografía: Gabinete de Comunicación de la Xunta de Galicia.
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
