sábado, 24 de octubre de 2026
Nota de prensa remitida por el Gabinete de Comunicación de la Xunta de Galicia:
A Escola de Teatro Valle-Innova levará a figura e a obra de Valle-Inclán polas catro provincias galegas coa iniciativa A maleta do mestre, un proxecto escénico conformado por catro montaxes teatrais que se representan en diversos escenarios entre xullo de 2016 e outubro de 2017 e que teñen como eixo central o Valle-Inclán viaxeiro.
A iniciativa enmárcase dentro das actividades promovidas pola Fundación Valle-Inclán, coa colaboración da Secretaría Xeral de Cultura, para celebrar o 150º aniversario do nacemento do dramaturgo galego. Os responsables das dúas institucións, José Juan Durán e Anxo Lorenzo, respectivamente, presentaron o programa da fundación, nunha rolda de prensa que tamén contou coa participación da secretaria territorial da Xunta de Galicia en Pontevedra, Ana Ortiz.
A proposta escénica A maleta do mestre inclúe a performance A viaxe marabillosa. Valle estético, o espectáculo de teatro de rúa Estacións valleinclanianas, a obra teatral de corte clásico Que os leve o vento e a visita guiada dramatizada A ruta das verbas. O Salnés de Valle-Inclán. Paradas de tren, portos e praias son algúns dos escenarios previstos para estes espectáculos, que chegarán desde o vindeiro 29 de abril aos concellos de Vilanova de Arousa, de Cambados, de Pontevedra, da Pobra do Caramiñal e de Santiago de Compostela, entre outros.
A programación promovida pola fundación co apoio da Consellería de Cultura e Educación complétase con edicións conmemorativas e iniciativas no ámbito educativo. Deste xeito, sairá do prelo un novo número da colección da revista Bradomín, que lles dará voz a xoves estudosos da obra do escritor, así como a profesores e profesoras de ensino secundario coa publicación de diversos traballos de investigación e divulgación sobre diferentes aspectos da figura e da creación literaria do autor.
Tamén verá a luz a publicación dunha obra na que Javier Serrano Alonso, profesor da Universidade de Compostela / Grupo de Investigación Valle-Inclán reúne a biografía do dramaturgo completada e actualizada e, co obxectivo de fomentar a creación literaria, porase en marcha o I Premio Fundación Valle-Inclán, dirixido ao alumnado de educación secundaria dos municipios valleinclanianos.
Un amplo abano de iniciativas literarias, representacións escénicas, ciclos de cine, exposicións, actuacións multiartísticas, charlas e obradoiros, entre outros, conforman o extenso programa de actividades que se desenvolverán en Galicia ao longo deste ano e mais do que vén con motivo do 150 aniversario do nacemento do dramaturgo, novelista, poeta e ensaísta Ramón María del Valle-Inclán.
Trátase dunha completa programación colectiva promovida pola Xunta en colaboración coas principais entidades e organismos vinculados dalgún xeito á figura deste dramaturgo universal, como é o caso dos concellos da Pobra do Caramiñal e de Vilanova de Arousa, a Asociación Amigos de Valle-Inclán, a Fundación que leva o seu nome, a Universidade de Santiago a través da Cátedra Valle-Inclán, o Consello da Cultura Galega, o Centro Galego de Artes da Imaxe (CGAI) o Centro Autonómico de Formación e Innovación (CAFI) e a Deputación de Pontevedra.
A programación completa está accesible en www.cultura.gal
Fotografía: Gabinete de Comunicación de la Xunta de Galicia.
Foi inaugurada no Museo do Pobo Galego a exposición 'Transfronteiriza', da artista e cineasta tudense Diana Gonçalves, que permanecerá aberta ao público ata o 28 de marzo de 2027. A mostra parte do documental 'Mulleres da Raia', da mesma autora, e froito de tres anos de investigación. A través da linguaxe cinematográfica, de materiais documentais, arquivos históricos e elementos patrimoniais, a proposta constrúe unha experiencia arredor da memoria compartida entre Galicia e o norte de Portugal. En concreto, Transfronteiriza recupera a memoria das mulleres que viviron na fronteira entre ambos territorios a mediados do século XX, que desempeñaron un papel fundamental no comercio transfronteirizo e na supervivencia económica das familias.
Trátase dunha iniciativa que nace como evolución de Circo Presente Continuo e que se vai desenvolver por primeira vez fóra de Madrid. A Cidade da Cultura, o Teatro Principal e o Salón Teatro serán as súas sedes na capital galega, reunindo artistas, compañías, profesionais da programación, distribuidoras e institucións para compartir proxectos e favorecer novas oportunidades de colaboración e contratación. O programa inclúe oito espectáculos, seis mostras breves e catro traballos en proceso. Entre as propostas figuran Naufragio, de Labsurda; Serena, de Circ Bover; Matrimonio, de Kolektivo Konika; Siku, de Jessica Arpin; e Sen patrón, de Pistacatro, que ofreceu un adianto artístico durante a presentación.
