sábado, 7 de noviembre de 2026
Nota de prensa del Gabinete de Comunicación del PSdeG:
A portavoz de Política Institucional do Grupo Socialista reclamou unha batería de comparecencias, de ata seis conselleiros e catro altos cargos do goberno, todos eles relacionados con contratos concedidos á Fundación de Estudos e Análises Fesan- logo da alerta do Consello de Contas fronte ás irregularidades nos cursos de formación.
A responsable socialista alerta dun presunto trato de favor transversal do que participan practicamente tódolos departamentos do goberno galego con diversas contías e diversos motivos, dende cursos de formación ata a xestión de centros residenciais ou escolas infantís. Todo un entramado de enxeñería de xestión de axudas concedidas e aprobadas polo procedemento negociado sen publicidade e cunha sorprendente celeridade.
Os socialistas queren que expliquen as axudas concedidas polos seus departamentos os conselleiros de Política Social, de Economía, Emprego e Industria, así como os de Educación, Medio Rural Mar e Infraestruturas e Vivenda, así como os secretarios xerais de Igualdade e Emigración e as directoras da Axencia de Turismo de Galicia e da Axencia para a Modernización Tecnolóxica de Galicia.
A deputada socialista quere que o goberno galego dea conta das irregularidades denunciadas polo Consello de Contas e por qué non lle entregaron as contas en tempo e prazo. Tamén quere que respondan do suposto trato de favor ofrecido dende o goberno galego con inspeccións laxas, a concesión de recoñecemento oficial aos cursos e prácticas supostamente irregulares.
Soneira advertiu que a única comunicación oficial da Xunta recoñece axudas por 8,1 millóns de euros entre 2009 e 2013. A responsable socialista puntualizou que dende a chegada de Feijóo ao goberno galego e o exercicio de 2014 a Fundación recibiu varias axudas menores correspondentes á Consellería de Presidencia, así como 2,5 millóns de Traballo ou outros 5 de Asuntos Sociais.
Tamén recibiu axudas procedentes da Consellería do Mar por preto de 200.000 euros, incluíndo unha sorprendente partida para organizar unha exposición, e diversas contías de Educación e Medio Ambiente.
Explicou que o caso de Fesán constitúe tan só unha parte de todo un rosario de organizacións que teñen como nexo común a utilización de fondos públicos, os contactos coa administración, con trasvase de cargos incluído, e os vencellos políticos co PP.
Lembrou o caso investigado pola Operación Zeta, con trato de favor a militantes destacados, supostos cursos de formación ficticios e desvío de recursos, ou a trama dos cursos de Lalín investigado na Operación Qatedra.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
