viernes, 6 de noviembre de 2026
O presidente da Xunta, Alberto Núñez Feijóo, avogou polo traballo coordinado das tres terminais galegas para que Galicia dispoña dun sistema aeroportuario cada vez máis modernizado e accesible. É, dixo, un dos maiores desafíos que teñen por diante as cidades con aeroporto nesta nova lexislatura municipal que comeza, na que o Goberno galego, asegurou, estará a disposición dos concellos e do Ministerio de Fomento.
O titular da Xunta presidiu a ampliación da pista do aeroporto coruñés de Alvedro, unha actuación que, segundo resaltou, converterá este aeroporto nun espazo moito máis seguro para operar, non só grazas á propia ampliación da pista, senón tamén pola reactivación do dispositivo antinéboa.
Nesta liña, sinalou que os aeroportos galegos, e o de Alvedro de forma destacada, volven presentar signos dunha forte vitalidade. De feito, apuntou que a terminal herculina, que rozou en 2014 a meta do millón de pasaxeiros e acumula en 2015 un novo e esperanzador incremento, afronta o futuro fortalecido cos elementos necesarios para manter e mesmo elevar esa puxanza.
Billete combinado de tren e autobús
Feijóo quixo subliñar, por outra banda, o compromiso do Goberno central coas infraestruturas de Galicia, e asegurou que esta colaboración entre a Xunta e o Estado permitirá poñer en marcha o antes posible un sistema de billete combinado bus+tren que facilite o acceso aos aeroportos galegos desde calquera cidade de Galicia.
Como proba deste compromiso lembrou os 1.000 millóns de euros destinados polo Ministerio de Fomento a ampliar a mellorar a rede viaria galega; os máis de 3.000 millóns de euros que están a facer posible que o tren de alta velocidade sexa unha realidade nos prazos comprometidos; ou o investimento na ampliación desta terminal coruñesa.
A nosa obriga como responsables públicos é estar á altura e aproveitar a oportunidade que representan os novos medios ao noso alcance, tirando deles a maior rendibilidade posible a prol da recuperación económica, concluíu.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur. De feito, destacan os altos rexistros acadados entre os días 9 e 15.
A Xunta de Galicia puxo en marcha a campaña de inmunización fronte á gripe e a COVID, que este ano incorpora como principais novidades a extensión da vacina antigripal de alta carga ás persoas de 65 a 69 anos e a ampliación do proxecto piloto de vacinación nos colexios a 75 centros educativos. O inicio oficial tivo lugar nun acto nas residencias de maiores e centros de discapacidade, o colectivo polo que arranca tradicionalmente a campaña debido á vulnerabilidade deste grupo fronte ás infeccións respiratorias.
