lunes, 10 de agosto de 2026
O conselleiro de Economía e Industria, Francisco Conde, salientou os 110 millóns de euros da nova convocatoria do programa Innterconecta como unha oportunidade para consolidar o liderado innovador das empresas galegas. O Estado, a través do CDTI, renova o seu papel clave no impulso á innovación galega coa presentación, xunto á Xunta, desta terceira convocatoria do Innterconecta, dixo Conde, que destacou que con estes apoios, que favorecerán proxectos innovadores nos que colaboren empresas de varias Comunidades Autónomas, Galicia comeza a aproveitar os Fondos 14-20 da Unión Europea, que continuarán este mesmo ano coas primeiras axudas da Axencia Galega de Innovación avaladas polos novos fondos europeos.
Conde subliñou o rol económico, tecnolóxico e social xogado polo Innterconecta en Galicia nos últimos anos, permitindo ás empresas, universidades e centros tecnolóxicos galegos manter un ritmo investidor en innovación. Uns resultados que se traducen na mobilización de 210 millóns de euros en proxectos innovadores nos que participaron case 400 empresas, así como nun notable impacto social. Neste senso, o conselleiro citou proxectos financiados no marco do Innterconecta como o desenvolvemento da primeira vacina contra a cistite; o proxecto Magallanes, botando en Redondela un revolucionario trimarán capaz de xerar enerxía mareomotriz; ou un sistema de xestión de biotoxinas mariñas, atacando un problema recorrente das nosas rías.
Este Innterconecta, enmarcado na Estratexia de Especialización Intelixente, ou RIS3, supón ademais un paso adiante na colaboración entre Estado e Xunta. De agora en diante, ambas as dúas administracións deseñarán os apoios ás empresas tendo moi en conta a complementariedade das axudas, de forma que se cubran todas as necesidades innovadoras das empresas, pero á vez se eviten duplicidades e sobrecustes dende a administración.
Conde resaltou que o éxito do Innterconecta en edicións anteriores foi tal que Galicia fixo un gran esforzo en xerar programas de innovación aberta inspirados nesta iniciativa, como o Conecta Pemes, co que busca trasladar eses beneficios á pequena empresa replicando o mesmo modelo do Innterconecta, e que mobiliza 50 millóns de euros; ou as Unidades Mixtas de investigación, que mobilizan outros 70 millóns atraendo a grandes compañías como Repsol, PSA, Esteve ou Gas Natural Fenosa para innovar en Galicia.
A loita contra os incendios forestais suma un novo aliado tecnolóxico ao servizo de toda a sociedade. A aplicación móbil ALume, deseñada para facilitar que calquera persoa poida dar a alarma sobre un foco de lume de forma inmediata e precisa, xa se atopa plenamente operativa e dispoñible para a súa descarga de balde nas plataformas Android e iOS. O obxectivo principal desta ferramenta é potenciar a detección temperá dos incendios forestais. Nunha emerxencia no monte, os primeiros minutos son decisivos para evitar que un foco inicial se converta nun gran incendio; por iso, ALume nace para acurtar os tempos de aviso e facilitar ao servizo de extinción datos exactos antes de despregar os medios sobre o terreo. Cabe sinalar que a aplicación leva xa 7.000 descargas e 200 notificacións que axudaron ao operativo.
Un dos grandes atractivos desta undécima edición será a estrea de dez novos espectáculos, todos eles impulsados por compañías galegas, un dato que evidencia o dinamismo creativo do sector dos monicreques na Comunidade. A programación abrirase coa nova versión de A festa dos títeres, presentada por Viravolta, Vai de Roda e Títeres Alakrán, para continuar coa estrea de Treco-lerias, de Trécola Producións, e A rosa de papel, adaptación ao teatro de monicreques do texto de Valle-Inclán realizada por Alakrán.
