miércoles, 21 de mayo de 2025
A nova compañía ArtesaCía preséntase en Santiago de Compostela co seu segundo espectáculo, Balor na acción dunha cadeira, unha proposta que aborda a emigración galega de primeiros do século pasado desde unha linguaxe teatral contemporánea. Este documental escénico, tal e como é definido polos seus creadores, abre a carteleira semanal do Salón Teatro con dúas funcións mañá mércores 20 e o xoves 21, ás 20.30 horas, que darán paso a un concerto de Jacobo Paz & Dos Mundos o venres 22 e á proxección da fita O Piloto o sábado 23.
O intento de recuperar unha historia familiar esquecida a do bisavó do director desta montaxe, Roi Fernández serve de motor para un proceso de creación multidisciplinar que ten o seu punto de partida nunha vella película dos anos vinte procedente da sociedade de emigrantes de Sada en Nova York. Os poucos fotogramas que sobreviven ao mofo e á humidade amosan unha nena bailando sobre unha cadeira, ao tempo que dan pé ao intento de reconstrución das imaxes perdidas e da historia de tres emigrantes galegos. Estes, tras cruzar o Atlántico por necesidade, regresan a Galicia para poñer en marcha as chamadas escolas modernas co obxectivo de lles ofrecer aos seus veciños un futuro mellor.
Recursos vangardistas
A partir de diferentes hipóteses sobre esta historia, as interpretacións da actriz Laura Villaverde e dos actores Simón Piñón e Gustavo Fouce enchen os baleiros na película para revisar a nosa tradición migratoria e reflexionar sobre a multiplicidade da historia, a educación, a cultura ou a relixión. Todo isto a través dunha linguaxe contemporánea e unha posta en escena vangardista na que se combinan o documental, o cine en directo, o video mapping, a iluminación e a composición sonora nun proceso de creación multidisciplinar.
Xunto ao trío actoral e ao director Roi Fernández, quen asina tamén a dramaturxia e mais o deseño de iluminación xunto a Héctor Pazos, Balor na acción dunha cadeira conta co espazo sonoro composto por Madamme Cell e o vestiario de Érica Oubiña.
Esta é a segunda proposta escénica de ArtesaCía, tras a estrea en 2012 de Uvas de collón de ghalo. Agora, a formación fundada por Laura Villaverde e Roi Fernández presenta en Santiago o resultado do proxecto co que inaugurou o programa de residencias técnicas do Teatro Colón da Coruña, onde tivo lugar a estrea do espectáculo o pasado mes de febreiro. Ademais, Balor na acción dunha cadeira contou para a súa realización cunha axuda da Agadic (Axencia Galega das Industrias Culturais) á produción escénica para compañías de nova creación.
As entradas para as súas dúas funcións en Santiago poden adquirirse no despacho de billetes do Teatro Principal (desde hoxe e ata o xoves, de 18.00 a 21.00 horas) ou no do Salón Teatro mañá e o xoves desde as 18.30 horas.
Evento de Elijomisartistas.com
A programación na sede do Centro Dramático Galego continuará o venres 22, ás 21.00 horas, cun concerto de pop-rock a cargo de Jacobo Paz & Dos Mundos e a favor da Federación Galega de Enfermidades Raras e Crónicas (Fegerec). Tras unha temporada apartado dos escenarios, o intérprete coruñés volve poñerse á fronte da súa banda para presentar un adianto do seu segundo disco nunha actuación programada a través da nova plataforma web Elijomisartistas.com.
Esta iniciativa, seleccionada polo programa Galician Open Future da Xunta de Galicia e Telefónica, propón un novo xeito de xestionar eventos culturais baixo demanda dos usuarios, que reservan a súa entrada de antemán co obxectivo de propiciar a actuación na súa localidade dun dos artistas rexistrados na plataforma. Garántese, así, a plena ocupación nas actividades, que comezan a organizarse unha vez obtida a demanda suficiente para completar ou superar o seu custo.
Proxección audiovisual
A oferta cultural no Salón Teatro para esta semana completarase coa proxección o sábado 23, ás 20.30 horas, do documental O Piloto. A Agrupación Cultural O Galo promove a estrea en Compostela desta fita arredor da figura do guerrilleiro antifranquista Xosé Luis Castro Veiga, coñecido popularmente como O Piloto. O fotógrafo Xosé Reigosa é o produtor e director desta fita, realizada a partir do guión de Afonso Eiré.
A entrada para asistir a esta sesión cinematográfica é gratuíta e xa se pode reservar a través do web www.acogalo.net.
Este novo centro, que conta cun orzamento inicial estimado de 2,07 millóns de euros, que será cofinanciado con fondos Feder, localizarase nunha parcela de preto de 24.000 m2, na zona de reestruturación parcelaria de Fisteus, en Curtis. Trátase dunha situación idónea desde o punto de vista loxístico, ao contar con boas comunicacións, e xeográfico xa que está próximo a municipios con menor poboación, que, tal e como incidiu a conselleira, é onde se ten identificado unha maior necesidade deste tipo de infraestruturas. O centro en si terá unha superficie de 2.300 m2 con capacidade para 300 cans e 200 gatos e as súas instalacións incluirán, entre outras dependencias, áreas para corentena, maternidade, illamento infeccioso, hospitalización, animais agresivos ou mantemento habitual de exemplares.
Segundo os datos do Instituto Nacional de Estatística, Galicia é a comunidade que máis reduciu en 2024 a taxa Arope, que mide o risco de pobreza e exclusión social. Actualmente, a taxa situase no 18,8%, a máis baixa da que se teñen datos e sete puntos por debaixo da media nacional. No caso concreto da pobreza infantil, os datos da estatística da Plataforma da Infancia revelan que Galicia foi en 2024 a comunidade coa menor taxa de pobreza infantil de toda España. En doce meses, a comunidade galega reduciu esta taxa en 10 puntos, ata quedar no 16%, moi por debaixo da media estatal, que se sitúa no 34,1%. Ademais, Galicia é única comunidade que ten alcanzado o obxectivo marcado polos Obxectivos de Desenvolvemento Sostible relativos á pobreza infantil.
