miércoles, 10 de junio de 2026
O presidente do Goberno galego, Alberto Núñez Feijóo, afirmou que David Cal representa os mellores valores de Galicia e propuxo buscar fórmulas de colaboración para contar coa súa experiencia no futuro.
Durante a entrega do galardón MARCA leyenda ao deportista, Feijóo lembrou que os galegos celebramos co piragüista cangués cada un dos seus éxitos como se foran de todos: cinco medallas olímpicas, cinco no campionato mundial e outras cinco nos europeos.
Ao longo da súa intervención, o responsable autonómico fixo fincapé en que Galicia non quere nin pode prescindir da súa experiencia, destacando o espírito de superación, de loita e de constancia do piragüista.
Feijóo concluíu felicitando a David Cal por todos os seus éxitos e recoñecendo a súa valentía non só en cada proba deportiva á que se ten enfrentado senón tamén para saber cando tiña que irse.
Tivo lugar a xornada 'Deputados por un día', na que os escolares galegos levaron ao hemiciclo as súas propostas para mellorar a sociedade. Os catro representantes dos colexios, un por provincia, compartiron na Cámara as súas reflexións sobre a convivencia, o tema arredor do que xira este curso o programa educativo Abraza tus valores, e a relación dos menores coas tecnoloxías. Participaron máis de 8.300 escolares de entre 4 e 12 anos de 83 centros públicos, concertados e privados de Galicia (Arquitecto Casas Novoa de Santiago, o CEIP Plurilingüe A Gándara, de Monforte de Lemos, o CEIP Plurilingüe Irmáns Villar, de Ourense e o CEIP Plurilingüe de Cerdeiriñas, de Piloño).
A actividade levada a cabo pola Axencia de Protección da Legalidade Urbanística (APLU) para protexer o medio ambiente e o patrimonio natural e paisaxístico galego permitiu o pasado ano a reposición da legalidade en 121 actuacións en toda Galicia. Estas reposicións foron resultado do labor do equipo inspector do organismo adscrito á Consellería de Vivenda e Planificación de Infraestruturas, e repartíronse principalmente na provincia de Pontevedra, con 60 actuacións, seguida da Coruña con 30, Lugo con 21 e Ourense con 10.
