Notas de prensa

A Xunta defende que Galicia Calidade é “o mellor pasaporte” para as empresas porque representa o “ADN galego e o compromiso coa calidade”

No acto de inauguración da campaña Galicia Calidade, en ruta, Vázquez Abeal subliñou que a marca representa “o compromiso das empresas galegas” co esforzo por ofrecer os mellores produtos e servizos; a “honestidade” no uso das mellores prácticas para a produción, elaboración e comercialización dos produtos; e o “esforzo de superación dos traballadores e empresas galegas” para ser competitivos nos mercados máis esixentes. “É una maneira de facer galega, que xera confianza nos consumidores”, engadiu.

Ademais, engadiu que Galicia Calidade está a traballar para a incorporación doutros sectores estratéxicos da economía galega, como o sector da madeira, o turismo, as plantas ornamentais, balnearios, granito, xeotermia ou a biomasa. E sinalou que se están a iniciar os contactos con outros sectores para sumar máis empresas, porque cantos máis produtos e servizos certificados, “maior é a eficacia da estratexia de promoción e obtense máis retorno para o conxunto da economía galega”. “Xuntos somos máis fortes e pódese competir fronte a outros selos con obxectivos idénticos”, apuntou.

Xerar valor engadido

Pola súa banda, o director xerente de Galicia Calidade, Alfonso Cabaleiro, explicou que a iniciativa Galicia Calidade, en ruta busca contribuír a “xerar valor engadido aos produtos e servizos desenvolvidos en Galicia, mediante a certificación de calidade que é o que transmite confianza e seguridade aos consumidores”.

Segundo dixo, esta acción de promoción está enfocada aos profesionais e prescriptores de opinión (aínda que tamén participará o público en xeral) co obxectivo de “poñer en valor os produtos do sector alimentario certificados por Galicia Calidade. “Facémolo primeiro en Galicia, porque ás veces non valoramos o que temos”, engadiu.

En Ruta

A campaña Galicia Calidade, en ruta, consiste nun roadshow no interior dun camión adaptado, que percorrerá as cidades de Santiago de Compostela (28 e 29 de novembro), Ourense (2 de decembro), Pontevedra (6 de decembro), Lugo (9), Vigo (12 e 13), Ferrol (16) e A Coruña (19 e 20), e no que se realizarán diversos showcookings, catas de viños e degustacións de produtos amparados por Galicia Calidade.

A iniciativa está destinada a profesionais do sector da gastronomía (hostalaría, restauración e retail), consumidores e prescriptores, para promover as virtudes dos produtos certificados pola marca de garantía.

Nas sete cidades galegas desenvolveranse dúas accións diferentes. A primeira delas, denominada "Esencial", consiste nunha degustación de "bocados de Galicia Calidade", elaborados polos chefs Marián Rodríguez e Iván Méndez e que ofrecerá unha ampla mostra da versatilidade e excelencia dos produtos. A segunda, denominada "De viños Galicia Calidade", consiste nunha maridaxe dos viños amparados por este selo con outros produtos como os xamóns, embutidos ou queixos, baixo a dirección de prestixiosos sumilleres como Xoan Cannas.

Nas cidades de Santiago, Vigo e A Coruña tamén se realizarán dúas accións máis en cada unha delas, con especial atención aos almorzos e ás conservas. Así, o "Almorzo Galicia Calidade" ofrecerá a combinación dun almorzo de calidade con café, leite, froitas, doces e outros produtos, baixo a direción do coñecido barista Oscar de Toro. A mostra "A Lata de Galicia Calidade" pretende destacar o valor e a versatilidade das conservas amparadas por este selo e o seu desenvolvemento en receitas gastronómicas.

A campaña Galicia Calidade en ruta enmárcase na estratexia de reforzo de Galicia Calidade, que cumprirá 20 anos en 2015, unha marca recoñecida e valorada polos consumidores que conta con máis de 250 produtos certificados, de 51 empresas diferentes.