Notas de prensa

Moción do Pleno sobre o código ético da Deputación de Ourense

A erosión da confianza da cidadanía na actividade política tense manifestado dun xeito evidente, o que obriga a institucións, aos partidos políticos e a representantes públicos a multiplicar esforzos para pór en valor a Política e a súa funcionalidade para unha sociedade democrática nuns momentos particularmente complexos.

A Presidencia da Deputación Provincial de Ourense, consciente da necesidade de facer unha aportación propositiva para a mellora da calidade democrática do noso sistema institucional, impulsa a través da presente moción a elaboración e aprobación dun Código Ético e de Conduta que regule as normas éticas de referencia para os cargos electos e o persoal ao servizo da administración provincial.

O Consello de Europa ten exposto que o contexto de grave e profunda crise económica que se instalou na Unión Europea, deriva no deterioro da calidade democrática das institucións locais e da propia vida política municipal, que implica en moitos casos unha maior desconfianza cidadá e, en concreto, unha atención intensificada fronte a calquera conduta política que non encaixe nas marxes razoables nos que se debe desenvolver a actividade política.

As entidades locais, e os propios representantes institucionais debemos, por tanto, redobrar esforzos por restablecer o valor da política local e recuperar a confianza da cidadanía. Neste contexto de maior esixencia pública, a política local en Ourense require un reforzamento do compromiso efectivo coas veciñas e veciños, un apuntalamento e exteriorización efectiva dos valores públicos, dos estándares de conduta e da actitude moral dos cargos públicos locais. E a esa finalidade atende esta proposta da presidencia do goberno provincial.

A Deputación Provincial de Ourense ten realizado importantes cambios nas súas prácticas de goberno e relación coa cidadanía. Esta institución actualizou as canles do acceso á información por parte dos cidadáns, e hoxe en día dispoñemos dun Portal de Transparencia que abriu un novo tempo na relación desta institución coa cidadanía, como da testemuña o feito de que a finais de 2013 Transparencia Internacional situara a esta Deputación entre as tres primeiras de España en canto a transparencia e acceso á información. A aplicación para dispositivos móbiles permitiu constituír un rexistro de incidencias provinciais que fai que calquera cidadán dende o seu teléfono contacte coa institución para demandar calquera cuestión relacionada coas administracións públicas. Estamos na era da administración 3.0 onde a intelixencia tecnolóxica ten un valor engadido no proceso irreversible de compartir toda a información que posúamos coa cidadanía.

Nesta liña considérase imprescindible seguir apostando pola mellora da calidade democrática das institucións, e así entendemos que sería bo dotar á Deputación Provincial de Ourense dun código de bo goberno, que implique ao conxunto dos representantes electos, goberno e oposición, pero tamén ao conxunto do persoal ao servizo da administración.

O compromiso ético no exercicio do servizo público, a tolerancia cero coa condutas impropias, a regulación dos agasallos institucionais ou a xestión responsable dos fondos públicos, serían algúns dos asuntos a abordar neste Código, a semellanza dos contidos que conforman disposicións similares que constitúen textos de referencia no dereito comparado. Incorporaríanse, así, determinadas obrigas, principios e responsabilidades que afectan á totalidade de quen forman parte desta institución.

En ningún caso é obxectivo desta iniciativa política o feito de aprobar ou subscribir ese código cunha finalidade de utilizalo como ferramenta de control político ou de descualificación recíproca, senón coa pretensión de interiorizar o seu contido e mellorar a imaxe institucional da entidade local, coa mirada posta en reforzar a confianza da cidadanía nas súas institucións.

En virtude do exposto,

esta Presidencia formula ao Pleno, con carácter aberto, favorecendo deste xeito a participación de tódolos grupos políticos, co obxecto de dotar á institución dunha norma avanzada en materia de bo goberno, a seguinte

MOCIÓN

O Pleno da Deputación de Ourense adopta o seguinte acordo:

1.-Elaborar no seo da Comisión Informativa de Patrimonio, Goberno e Réxime Interior unha proposta de Código Ético e de Conduta dos cargos electos e do persoal ao servizo da administración provincial.

2.- Presentar, no prazo de dous meses, ao pleno da Corporación Provincial dita proposta para o seu debate e, no seu caso, aprobación.