Notas de prensa

Estréase o filme documental galego “Costa da Morte” no Festival de Cine de Locarno (Suiza)

Este documental, producido por Zeitun Films e realizado co respaldo da Consellería a través da axudas da Axencia Galega das Industrias Culturais (Agadic) para o desenvolvemento e promoción do talento audiovisual, proxectarase o vindeiro domingo día 11 dentro da sección de competición Cineastas do Presente.

O equipo de Costa da Morte conta tamén coa colaboración de Cultura e Educación para asistir á 66ª edición do certame, referente para a produción cinematográfica independente, onde esta fita galega será a única representante de España entre as 16 películas seleccionadas para competir polo Prado de Ouro dentro desta categoría, dedicada a directores emerxentes que presenten óperas primas ou segundas longametraxes tanto documentais como de ficción.

O filme introduce os espectadores nesta zona de Galicia a través do relato dos seus habitantes e da súa relación coa paisaxe. Tradición e lenda fúndense no imaxinario colectivo, asociado ademais á vinculación desta terra coa idea de fin e de morte. O documental convértenos en testemuñas do traballo que realizan pescadores, mariscadores, madeireiros… nun labor cotián que os leva a manter, á vez, unha relación íntima e unha batalla coa inmensidade do contorno natural.

Neste sentido, o vento, a pedra, o mar ou o lume son tamén personaxes en Costa da Morte, e a través deles achegámonos ao misterio da paisaxe, entendida como unha unidade xunto ao home, a historia e o misterio.

Soporte dixital

Para o seu debut na dirección de longametraxes, Patiño contou cunha achega de 20.000 euros por parte da Agadic, a máxima contía outorgada no marco da convocatoria de 2011 de subvencións ao talento audiovisual galego na modalidade destinada á realización de longas en soporte dixital.

O resultado deste traballo será presentado este domingo en La Sala de Locarno no marco do seu Festival del Film, que o ano pasado reuniu máis de 160.000 espectadores entre profesionais, prensa especializada e afeccionados. Mañá inaugúrase a súa 66ª edición, que se estenderá ata o vindeiro día 17 e durante a que se programarán máis de 300 citas audiovisuais en diferentes espazos da cidade.

Formación e traxectoria

Lois Patiño (Vigo, 1983) compaxinou os seus estudos de Psicoloxía na Universidad Complutense de Madrid cos de cinema na Escuela Universitaria de Artes y Espectáculos TAI. Continuou a súa formación audiovisual na New York Film Academy e en Barcelona, onde realizou o Master de Documental de Creación na Universitat Pompeu Fabra. Así mesmo, ten realizado cursos de videocreación na Universität der Künst de Berlín, baixo a titoría de Katherin Sieverding, e talleres con artistas e cineastas como Joan Jonas, Pedro Costa, Víctor Erice, José Luis Guerín ou Daniel Canogar, entre outros.

Con seis curtas estreadas, ademais de vídeos e videoinstalacións, as súas obras foron presentadas en centros de arte como o Pompidou de París, o Reina Sofía de Madrid, o Haus der Kuilturen der Welt de Berlín ou o Centro Galego de Arte Contemporánea (CGAC) de Santiago de Compostela, ademais de en festivais internacionais de cine como o de Roma, Oberhausen (Alemaña), Vila do Conde (Portugal) ou o BAFICI de Bos Aires.