sábado, 17 de mayo de 2025
O secretario xeral para o Deporte, José Ramón Lete Lasa, anunciou que a Xunta de Galicia, apoiada pola Deputación de Pontevedra, presentará á Fundación Príncipe de Asturias a candidatura do cangués David Cal ao Premio Príncipe de Asturias do Deporte 2013.
A extraordinaria traxectoria de David Cal, e que xa foi recoñecida co Premio Nacional do Deporte Don Felipe de Borbón ou coa Medalla de Ouro da Real Orden do Mérito Deportivo, entre outras distincións, entendemos que é meritoria deste galardón, apuntou Lete Lasa, quen referiu, ademais, que neste proceso de preparación da candidatura se están a solicitar os apoios do Comité Olímpico Español, o Consello Superior de Deportes ou as Federacións Galega e Española de Piragüismo, entre outros organismos e institucións.
Os resultados acadados polo deportista son a recompensa ao labor e esforzo realizados durante anos, un orgullo para Galicia; e, ao noso entender, avalan unha sólida candidatura ao Premio Príncipe de Asturias do Deporte, remarcou José Ramón Lete.
Traxectoria
David Cal Figueroa naceu en 1982 no concello de Cangas do Morrazo. Iniciouse no mundo do piragüismo aos 8 anos e a súa vida deportiva descorreu en torno ao seu club, o Club de Mar Ría de Aldán, e ao Centro Galego de Tecnificación Deportiva de Pontevedra. Alí traballou con diferentes adestradores desde os 14 anos e coñeceu a súa man dereita e actual preparador, Suso Morlán.
Cal é o deportista español con máis medallas olímpicas, cinco en total, unha de ouro e catro de prata, conseguidas nas citas olímpicas de Atenas 2004, Pekín 2008 e Londres 2012 en dúas categorías C-1 500 metros e C-1 1.000 metros. O seu palmarés inclúe tamén cinco medallas en Campionatos do Mundo e seis en Campionatos de Europa, entre outros méritos.
O ciclo de concertos Orballo Cultural vén de presentar a súa edición 2025, que se celebrará entre os meses de maio a setembro. Este ciclo propón levar ata distintas localidades da xeografía galega, concretamente aos concellos de Estrada, Tomiño, O Porriño, Ribadavia, Muxía, Noia, Ferrol e Sanxenxo, a artistas da escena musical galega. Entre os nomes xa confirmados están Xabier Díaz & Adufeiras de Salitre, Su Garrido Pombo, Herdeiros da Crus ou The Limboos. O ciclo Orballo Cultural busca unir a variada oferta musical de Galicia co patrimonio cultural e natural de distintas localidades, de tal modo que se pon en valor a rica variedade de opcións turísticas da comunidade. Ademais, integra a gastronomía e a artesanía como valores engadidos, nunha proposta que quere apostar pola sostibilidade e a igualdade.
A exposición afonda na realidade das cantareiras dende o século XVIII ata os nosos días. Daquelas, as mulleres das aldeas tocaban por pura necesidade, xa que non había outra maneira de escoitar música ca creándoa. Frei Rosendo Salvado e Rosalía de Castro xa se interesaron no seu tempo polas cantigas populares galegas considerándoas 'pura poesía, sen artificio' a pesar de estar nunha lingua diferente da oficial e proviren de mulleres labregas, de clase baixa. Rosalía foi, de feito, quen máis se identificou con esa literatura, empatizando co sentimento do pobo e levándoo ás altas esferas da época. A mostra tamén recolle, a través de varios documentos, o interese de persoas estranxeiras como Dorothé Schubarth, Alan Lomax ou Gustav Henningsen pola nosa tradición.
