martes, 16 de junio de 2026
O xornalista Valentín Carrera presenta o seu novo libro: As Eleccións xerais do 20N na rede, un ebook do que é autor xunto a Yolanda del Campo e que analiza a irrupción das redes sociais na campaña das xerais
Unha selección dos mellores analistas da política galega danse cita na Deputación para debater sobre o 21-O
Unha selección dos mellores analistas da política galega déronse no Salón de Actos da Deputación de Lugo para debater sobre o 21-O. Anxo Lugilde, columnista de El Progreso e La Vanguardia; Domingos Sampedro, o destacado cronista político de La Voz de Galicia; José Luis Gómez, exdirector de Xornal e pioneiro en prensa web e comentarista en TVE e outros medios; e Xabier Blanco, delegado en Santiago do diario La Región, abordarán temas como o posible fin do tripartidismo no Parlamento autonómico tras os comicios, a abstención como reflexo do desencanto popular e a incidencia da crise e as políticas de Rajoy na cita dos galegos coas urnas.
O xornalista e escritor Valentín Carrera moderará a mesa redonda, organizada polo organismo provincial baixo o título: Eleccións galegas: O futuro do noso país. Todos eles, cunha dilatada e prestixiosa traxectoria profesional, comparten ademais a súa participación en dúas tertulias de referencia do país: O Faladoiro e A Crónica, na Radio Galega.
Previamente a este debate, ás 20:00 horas, Valentín Carrera presentará o seu novo libro, As Eleccións xerais do 20N na rede: crónica e análise da campaña, un ebook do que é autor xunto a Yolanda del Campo e que analiza a irrupción das redes sociais nas últimas xerais. Trátase da continuación doutra obra anterior publicada hai un ano, Municipais 2011 en Galicia, ambas as dúas editadas en ebook por Edicións Lea. O titular da Corporación provincial, José Ramón Gómez Besteiro, presidirá ámbolos dous actos -presentación do libro e debate-, que organiza a Deputación.
Aposta polas novas tecnoloxías e a Rede
Os autores de As Eleccións xerais do 20N na rede, Carrera e Del Campo, traballan como community managers e fan con este ebook unha decidida aposta polas novas tecnoloxías e a Rede. Yolanda del Campo, que actualmente desempeña o seu labor na Escola de Cine de La Habana, é licenciada en Publicidade e Comunicación Audiovisual, realizadora de TV (a súa última serie na TVG foi O fío do retrato) e artista multimedia.
Pola súa banda, Valentín Carrera é escritor e xornalista de longa experiencia, autor dunha ducia de libros (Riosil, premio Blanco Amor de Novela) e numerosas series de TV (dende As viaxeiras da luz a Doa a doa), ademais de blogueiro da actualidade política galega en @Tornarratos e colaborador de Galicia Confidencial e outros medios.
En canto ao ebook, pódese descargar na web de Edicións Lea, a través do seguinte enlace: http://lea.galiciamedia.com/index.php/catalog/product/view/id/288/s/as-eleccions-xerais-do-20n-na-rede-pdf/category/10
Trátase da segunda entrega dunha serie de catro análises electorais: o primeiro estivo dedicado ás eleccións municipais (maio 2011); este céntrase na campaña das xerais do 20 de novembro pasado; o terceiro abordará xustamente a campaña das autonómicas galegas que está quentando motores; e rematará a serie cun cuarto traballo dedicado, no seu momento, á presenza e participación galegas no Parlamento Europeo. Os autores explican que se trata de catro escalóns político-administrativos (municipal, autonómico, estatal e europeo) aos que podería engadirse un quinto sobre as pedanías, se non fose porque están en proceso de desaparición.
Dobre lectura: Crónica desenfada e detida análise
Segundo Carrera e Del Campo, as 200 páxinas do libro que agora se publica teñen unha dobre lectura: fan unha crónica subxectiva e desenfadada de como foi a campaña electoral das xerais nas catro provincias galegas e percorre, día a día, nunha detida análise, a fervenza de informacións na Rede, principalmente en Twitter e Facebook. Os xornalistas afirman que esta análise é posiblemente a parte máis novidosa do ebook: en maio de 2011, coa explosión do famoso 15M, a campaña estreouse timidamente nas redes sociais e algúns candidatos aventuráronse a dar os seus primeiros pasos en Twitter e Facebook, con certo despiste. Apenas seis meses despois, no 20N, a campaña xa discorreu pola rede dun xeito fluído e case principal, deixando atrás outros medios de comunicación.
Para os autores, todo fai prever que nas eleccións autonómicas do 21 de outubro as redes sociais e os medios online van ter un papel preponderante e decisivo, toda vez que os recursos económicos son escasos, as campañas terán orzamentos reducidos e as redes permiten, especialmente aos grupos novos ou pequenos, facer a súa guerrilla informativa cun custe económico moi baixo.
A posta en marcha do Rexistro galego de persoas centenarias, Regace, sitúa Galicia nunha posición de referencia para o estudo da lonxevidade, posibilitando coñecer mellor as claves deste fenómeno e afrontar os retos que presenta. Preto de 1.800 persoas de cen ou máis anos viven na comunidade galega, o que supón ao redor do 12 % de toda a poboación centenaria de España, un dato que fala da realidade demográfica de Galicia e reflicte unha oportunidade única para aprender, investigar e avanzar. Deste xeito, Galicia presenta un dos mellores resultados no que a esperanza de vida se refire: 81,19 anos para os homes e 86,83 para as mulleres, superando en ambos os casos a media estatal.
A mostra a 'Illa ignorada' estará aberta ata o 12 de febreiro de 2027 e toma o seu título do primeiro poemario da escritora Gloria Fortes. Nela cabe destacar os traballos tanto dos artistas galegos Alberto Ardid, Vicente Blanco, Andrea Costas, Caxigueiro, Fina Mantiñán, Juan Carlos Meana, Ariadna Silva, Seoane e María Elena Montero, como os de Abel Azcona, Amparo Garrido, Regina Giménez, Antoni Muntadas, Sonia Navarro, Íñigo Royo, Regina Silveira. Ademais desta nova mostra, o centro tamén inaugurou a ampliación, no dobre espazo do Centro Galego de Arte Contemporánea, da exposición Misha Bies Golas, que abriu ao público o pasado 22 de maio cunha escolma de máis de dúas décadas da creación heteroxénea do lalinense Miguel Calvo Ulloa, un dos fundadores do colectivo Nova Escultura Galega.
