viernes, 6 de noviembre de 2026
O presidente da Xunta, Alberto Núñez Feijóo, expresou a súa gratitude e apoio ao proxecto Fondo de Capital Riesgo CRB BIO II xa que conseguir 30 millóns de euros que poden chegar ata 60 significa convencer a institucións públicas e europeas e significa convencer tamén a patrimonios nun momento no que teñen que priorizar máis que nunca as súas apostas e as súas inversións. Un novo fondo con empresas galegas baseado na aposta dun novo modelo de crecemento económico, engadiu. Do mesmo xeito, transmitiu a súa seguridade de que unha inversión en Galicia é un acerto no sector, no momento e seguramente nos resultados.
O responsable autonómico amosou a súa satisfacción ante estas iniciativas que animan as inversións e a capacidade instalada en Galicia e nesta provincia da Coruña para xerar confianza nuns momentos nos que non é só unha palabra senón tamén un valor en alza.
O responsable do Goberno Galego expresou que é unha boa noticia que haxa inversores coma os que están aquí dispostos a deixar pegada económica na nosa terra e que tamén é un motivo de satisfacción para os inversores ter a seguridade de que se trata dunha comunidade solvente e fiable, e máis nunha época como a que nos toca vivir. Feijóo mostrou a súa convicción de que a innovación e a internacionalización son as dúas chaves para que as comunidades autónomas resistan algo mellor a situación do mercado interno da economía española que arrastra xa un lustro de crise.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
