Notas de prensa

Cultura remata a restauración e posta en valor do Camiño Francés en San Xil do Carballo

Estas actuacións, que contaron cun orzamento de 75.867 euros, enmárcanse no Plan de Restauración e Posta en Valor dos Camiños de Santiago, elaborado pola Dirección Xeral do Patrimonio Cultural, que pretende rehabilitar e acondicionar os espazos públicos, carballeiras e patrimonio etnográfico do seu entorno co obxectivo de mellorar as condicións para o uso dos seus habitantes e dos peregrinos destas rutas.

A finalidade da intervención neste tramo foi crear no acceso ao casarío de San Xil do Carballo unha serie de áreas de descanso onde os peregrinos e os veciños puideran repousar e contar cunha zona de ocio e relación social vinculada ao Camiño de Santiago. A intervención persegue non só mellorar a imaxe da que goza o peregrino senón dotar de espazos axeitados e de calidade aos veciños que viven ao carón da ruta histórica, mellorando así, dalgún xeito, a súa calidade de vida.

Entre as principais actuacións realizadas destaca a reconstrución dun muro de pedra, para crear un banco e unha zona pavimentada de acceso á aldea que actúe como espazo de benvida a carón dunha zona onde remansa a auga. Asemade, no contorno da igrexa recupérase unha antiga fonte e corríxese a imaxe dunha ponte existente formada por tubos de formigón. Na igrexa actúase minimamente sobre a súa imaxe pintando os revestimentos de cemento, corrixindo a súa visión e mellorando o seu aspecto, o que permite unha posta en valor deste elemento. No pequeno cemiterio corríxese a súa imaxe deturpada e ponse en valor o conxunto eliminado un muro de bloque de formigón que se substituíu por un novo muro de pedra de cachotería de traza e imaxe tradicional e coherente cos valores históricos e paisaxístico do lugar.


Trece actuacións no Camiño Francés

Esta é unha das trece actuacións previstas na primeira fase do Plan de Restauración e Posta en Valor dos Camiños de Santiago, elaborado pola Dirección Xeral do Patrimonio Cultural, que se desenvolverá nun total de doce municipios de Galicia polos que discorre o Camiño Francés. A Consellería de Cultura e Turismo e o Ministerio de Fomento, con cargo ao 1% cultural, asinaron un acordo para o cofinanciamento destas trece actuacións de posta en valor cun orzamento total de 2.750.000 euros. En concreto, inclúe actuacións nos municipios de Pedrafita do Cebreiro, Triacastela, Samos, Paradela, Monterroso e Palas de Rei na provincia de Lugo; e Melide, Arzúa, O Pino e Santiago de Compostela na provincia da Coruña. O obxectivo da Consellería de Cultura e Turismo é que o Plan se amplíe a todos os Camiños de Santiago no seu desenvolvemento futuro.

Con este programa de actuacións previstas nos tramos do Camiño Francés que precisan unha meirande urxencia, a Dirección Xeral do Patrimonio Cultural incide directamente e de xeito inmediato sobre a configuración dos propios camiños de peregrinación, dos lugares de reunión e de uso que se estruturan ao seu redor e dos elementos esenciais que os bordean, limitan e lles dan forma. O Plan de Restauración e Posta en Valor dos Camiños de Santiago pretende rehabilitar e acondicionar os espazos públicos, carballeiras e patrimonio etnográfico do seu entorno co obxectivo de mellorar as condicións para o uso dos seus habitantes e dos peregrinos. O programa propón a recuperación sustentable e a posta en valor dos lugares de uso comunitario (prazas, fontes ou lavadoiros) que serven de punto de encontro para a celebración de reunións, festas ou actividades comúns nos núcleos rurais. Son espazos de intercambio de cultura e coñecementos que fomentan as actividades sociais e que constitúen sinais de identidade propios e singulares da nosa paisaxe cultural.