martes, 11 de agosto de 2026
O Centro Tecnolóxico Agroalimentario de Lugo e NEXUM GALICIA AIE asinaron un protocolo de colaboración para a realización dun proxecto de desenvolvemento tecnolóxico sobre valorización de subprodutos da industria cárnica, concretamente do sangue de porcino, dentro do programa RESIC (Revalorización de Subprodutos de Industrias Cárnicas) do CETAL.
Eduardo Vidal explica que ambas as dúas entidades elaborarán conxuntamente un detallado anteproxecto, nun prazo de 4 meses, onde se establecerán os aspectos básicos de dito proxecto de desenvolvemento tecnolóxico, o seu alcance e contido, así como os condicionantes e límites da súa viabilidade.
O director da Fundación lucense sinala que á vista dos resultados do anteproxecto abordarase o desenvolvemento tecnolóxico propiamente dito e, nunha fase posterior, podería promoverse a creación dunha empresa mercantil para a explotación comercial dos resultados do proxecto, no seu caso.
Contémplase, a súa vez, a posibilidade de establecer convenios de colaboración con universidades, centros tecnolóxicos, industrias, entre outros, para a fase de desenvolvemento tecnolóxico.
O presidente do consello de administración de NEXUM, Adolfo Campos Vázquez, expuxo que esta entidade está integrada por a maioría das principais firmas cárnicas galegas e ten como obxecto a xestión, en beneficio dos seus socios, dos subprodutos de matadoiro. O noso interese prioritario é incorporar innovacións tecnolóxicas que nos permitan conseguir a revalorización dos subprodutos das actividades industriais dos nosos socios.
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
