martes, 11 de agosto de 2026
A Fundación Galicia Europa (FGE) participa cun stand propio na IV Feira Europea de Emprego que se celebra no Campus de Elviña da Coruña, o 11 e 12 de abril. O equipo da FGE informará aos asistentes sobre as distintas bolsas que convoca anualmente, dirixidas a formar aos mozos e mozas galegos nos asuntos comunitarios, e distribuirá exemplares da Guía de prácticas e saídas laborais na Unión Europea e organizacións internacionais, editada pola propia Fundación.
Ata a actualidade máis de 400 persoas teñen participado no programa de formación da FGE, que consta de cinco liñas principais: as bolsas sobre asuntos europeos dirixidas a titulados universitarios nas oficinas belga e compostelá da FGE; os masters de especialización na UE en centros universitarios belgas; as dotacións económicas para estudantes que estean a realizar prácticas non remuneradas nalgunha institución comunitaria; as estadías curtas en Bruxelas para o persoal dos membros do Padroado da Fundación; e unha bolsa sobre a xestión de proxectos europeos de I+D+i no ámbito sanitario.
Nestas xornadas, o equipo da Fundación repartirá exemplares da nova edición actualizada da Guía de prácticas e saídas laborais na Unión Europea e organizacións internacionais. Nela recóllense e sintetízanse as bolsas que ofrecen a FGE, as consellerías da Xunta de Galicia, entidades públicas ou privadas de prestixio, institucións da UE, e organizacións internacionais como a ONU, o FMI, a OMC, o Banco Mundial... e organismos dedicados á cooperación internacional, como a AECID, Cruz Vermella, Intermon Oxfam
Ademais, a Fundación participará nunha das mesas redondas incluídas no programa da Feira. O asesor técnico da FGE, Luis Gago, intervirá no coloquio Xuventude en Movemento que se terá lugar o martes ás 11.30h na Facultade de Ciencias da Educación.
IV Feira Europea de Emprego
Este evento, organizado pola Universidade da Coruña-SAEE e Europe Direct Coruña co apoio do concello herculino e da Xunta de Galicia, busca reunir a empresas e organismos públicos co fin de promover a mobilidade laboral dos máis novos.
As entidades participantes orientarán e informarán sobre as oportunidades laborais e de formación aos visitantes, así como intervirán en cafés-negocios nos que se analizará a necesidade de dinamizar o emprego a nivel local, rexional e europeo.
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
