martes, 11 de agosto de 2026
A Xunta de Goberno Local do Concello de Ourense acordou esta mañá conceder a Hipercor licenza de apertura e obra de Centro Comercial, con aparcamento na parcela 11 A- AR-39 E Finca Mariñamansa.
Segundo o acordo adoptado pola Xunta de Goberno Local, a concesión da licenza queda condicionada á cesión para uso público do vial resultante do proceso de urbanización, que nacerá da actual rotonda sita na glorieta de Avenida de Zamora, intersección con Nosa Señora da Saínza e discurrirá pola parte posterior do Complexo Hospitalario, así como os soportais que xenere a construción do centro comercial.
O acordo adoptado pola Xunta de Goberno aproba o proxecto básico presentado pola empresa que, para iniciar as obras, deberá solicitar previamente a execución da licenza.
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
